Կիևը սկսել է ՀՆԱ-ին կապակցված պետական պարտքի ռեստրուկտուրիզացիան

Financial Times-ը գրում է, որ Ուկրաինայի իշխանությունները պաշտոնապես սկսել են տնտեսական աճին կապակցված պետական պարտքի ռեստրուկտուրիզացիան։ Ֆինանսների նախարարության հրապարակման համաձայն՝ Կիևը վերաձևավորում է շուրջ 2,6 միլիարդ դոլարի պարտավորություններ, որպեսզի նվազեցնի հետպատերազմյան ծանր բյուջետային ճնշումները և զսպի պարտքի աճը։ Նախարարությունն արդեն առաջարկել է ներդրողներին փոխանակել ՀՆԱ-վարրանտները նոր պարտատոմսերի հետ՝ խոստանալով մինչև 180 միլիոն դոլար բոնուս և տոկոսադրույքների աստիճանական բարձրացում։

Ֆինանսների նախարար Սերգեյ Մարչենկոի խոսքով՝ առանց ռեստրուկտուրիզացիայի երկիրը կարող է ապագայում վճարել միլիարդավոր դոլարներ, քանի որ ՀՆԱ-ի աճը ավտոմատ բարձրացնում է պարտքի վճարումները։ Դա, ըստ նրա, կշեղի կենսական միջոցները պաշտպանության, վերականգնման և պետական հիմնարար ծառայությունների ֆինանսավորումից։ Քայլը դիտվում է որպես Կիևի պատրաստություն՝ թե՛ հնարավոր խաղաղ պայմանավորվածությունների, թե՛ երկարատև պատերազմի ռիսկերի համար։

Նշվում է, որ Ուկրաինան արդեն չի կատարել 670 միլիոն դոլարի վճարում ՀՆԱ-ին կցված արժեթղթերի համար, ինչի հետևանքով S&P Global Ratings-ը պահում է երկրի վարկանիշը դեֆոլտային մակարդակում։ Մինչ արևմտյան երկրներում նոր օգնության վերաբերյալ քննարկումները շարունակվում են երկար, ԱՄՀ առաքելության ղեկավար Գևին Գրեյը նախազգուշացրել է, որ միջազգային աջակցությունը ժամանակի ընթացքում նվազելու է, և Կիևը պետք է զարգացնի սեփական ինքնաֆինանսավորման մեխանիզմները։