«Porsche Russland»-ը հաստատել է Porsche ավտոմեքենաների զանգվածային բլոկավորումը

Ռուսաստանում գտնվող «Porsche Russland» ներկայացուցչությունը հայտնել է, որ վերջին շրջանում աճել է ավտոմեքենաների տերերի դիմումների թիվը՝ կապված շարժիչի չգործարկվելու խնդիրների հետ։ Ըստ ընկերության, մի շարք Porsche ավտոմեքենաներ չեն արձագանքում կառավարման հրահանգներին, և շարժիչը հրաժարվում է գործել առանց մասնագետների միջամտության, ինչի պատճառով տերերը փաստացի չեն կարողանում օգտվել մեքենաներից։

Նախքան այդ, «Ռոլֆ» ընկերությունը տեղեկացրել էր, որ Ռուսաստանում ներքին այրման շարժիչով Porsche-ների մի մասը կարող է բախվել ծրագրային խափանման, երբ ավտոմեքենան ամբողջությամբ արգելափակվում է։ Որպես ժամանակավոր լուծում, սեփականատերերին առաջարկվել է անջատել մեքենայի էլեկտրամատակարարող մարտկոցները առնվազն 10 ժամով՝ համակարգերի վերագործարկումը ապահովելու համար։ Մասնագետների նախնական գնահատմամբ՝ խափանման հավանական պատճառը կարող է լինել արբանյակային ազդանշանի միջամտությունը, որը խաթարում է անվտանգության համակարգի աշխատանքը։

Ավտոմոբիլային փորձագետ Մաքսիմ Ռակիթինը նշել է, որ նման դեպքերում տերերը պետք է սպասեն լրացուցիչ ախտորոշման արդյունքներին, որպեսզի կարելի լինի ճշգրիտ որոշել խափանման պատճառը։ Նրա խոսքով՝ իրավիճակը ունի ծրագրային բնույթ, և պատճառների բացահայտումը կնշանակի նաև համապատասխան վերականգնման մեխանիզմների սահմանում, հայտնում է Lenta.ru-ն։