Այս պատվերը ՔՊ-ի կողմից է, իմ ձեռքերը մաքուր են. Վարդան Ղուկասյան

Հակակոռուպցիոն դատարանում այսօր կայացավ Գյումրու քաղաքապետ Վարդան Ղուկասյանի և որդու՝ Սպարտակ Ղուկասյանի գործով հերթական նիստը։ 

Նիստի սկզբում Վարդան Ղուկասյանն օծանելիք ցանեց իր վրա, ապա տվեց որդուն։ Դատավորը պահանջեց պահել օծանելիքը, Վարդան Ղուկասյանը պատասխանեց. «Դուխի է»։

Զարուհի Փոստանջյանն, ով այս նիստում ներգրավվեց որպես  Վարդան Ղուկասյանի պաշտպան, միջնորդություն ներկայացրեց։

«Ուղիղ եթերում տեսել եմ, թե ինչ տեղի ունեցավ դահլիճում նախավերջին դատական նիստից հետո։ Իմ վստահորդի նկատմամբ, նաև Սպարտակ Ղուկասյանի, նիստից հետո  նիստերի դահլիճում գտնվող երկու ոստիկաններ կեղծ զրպարտչական, սուտ մատնությամբ են հանդես եկել, իմ վստահորդի նկատմամբ նախաձեռնվել է  հանրային քրեական հետապնդում։

Այդ հանրային քրեական հետապնդումը նախաձեռնվեց, կարծում եմ, հատուկ պատվերի ներքո։ Ամբողջն ուղիղ եթերում էր, ես չեմ լսել այնտեղ հայհոյանքներ, մինչդեռ Սպարտակ Ղուկասյանն այդ ժամանակ երբ գալիս էր դատարան, գտնվում էր տնային կալանքի ներքո, իսկ այդ իրադարձություններից հետո այնպիսի  իրավիճակ ստեղծվեց, որ Սպարտակ Ղուկասյանի նկատմամբ դատարանն ապօրինաբար ընտրեց խափանման միջոց կալանավորումը, դրա հետ մեկտեղ կիրառեց  չափազանց կտրուկ սահմանափակում՝ ընդհուպ արգելվել է շփումն ընտանիքի անդամներ հետ։

Միջնորդությունը վերաբերում է նրան, որ դատական նիտերից հետո իմ վստահորդների անվտանգությունն ապահովված չէ։ Մենք դիտարկում ենք, որ դատարանի դահլիճում տեղի է  ունեցել բռնություն իմ վստահորդների նկատմամբ։ Դա եղել է  դիտավորյալ, սուտ մատնությամբ»,- ասաց Փոստանջյանը՝ նշելով, որ դատարանից հայցում են ապահովել անվտանգություն, որպեսզի զերծ մնան զրպարտչական, սուտ մատնիչներից։

Դատավորն ասաց, որ մեղադրյալների տեղափոխումը ՔԿՀ-ից և նրանց անվտանգության ապահովումն իրականացվում է սահմանված կարգով իրավասու պետական մարմնի կողմից, դատարանը որևէ պարտականություն, իրավասություն չունի դատական նիստի ավարտից հետո  ապահովելու մեղադրյալի անվտանգությունը։

«Դրա համար կան իրավասու մարմիններ»,- հայտարարեց դատավորը։

Վարդան Ղուկասյանը նիստից հետո տեղից նշեց, որ  այս պատվերը ՔՊ-ի կողմից է. «Մենք մաքուր են, իմ ձեռքերը մաքուր են։

Էդ անունն իմ վրա չի կպնում, բայց քննիչները,  դատախազներն ու դատավորները, եթե հանձնարարականով ինձ դատեցին, պատասխան են տալիս։ Նրանք իրենց աշխատավարձի, ընտանիքը  պահելու համար մեզ պես մարդկանց կոծանում են, բայց իրենք շան օրն են ընկնելու, որովհետև վերևում Աստված կա»։

Հիշեցնենք, որ Հակակոռուպցիոն կոմիտեն ավարտել է Գյումրիի քաղաքապետ Վարդան Ղուկասյանին առնչվող կաշառքի գործի քննությունը: Ղուկասյանը մեղադրվում է քաղաքի ճարտարապետի միջոցով Գյումրիի քաղաքացուց նրա կառուցած ինքնակամ շինությունը օրինականացնելու դիմաց կաշառք պահանջելու համար։ 

Իսկ Գյումրիի Սպարտակ Ղուկասյանը երկու ամսով կալանավորվել է նոյեմբերի 21-ին։ Մինչ այդ նա տային կալանքում էր գտնվում։ Քրեական վարույթն վերաբերում է Սպարտակ Ղուկասյանի հայտարարությանը՝ իր վերաբերյալ քրեական գործով դատական նիստից հետո հնչեցվածին, որն, ըստ ՔԿ-ի, հայհոյանք է պարունակում։