Խորհրդարանը քննարկում է Կոռուպցիայի կանխարգելման հանձնաժողովի անդամի ընտրության հարցը

Խորհրդարանը քննարկում է Կոռուպցիայի կանխարգելման հանձնաժողովի (ԿԿՀ) անդամի ընտրության հարցը:

ԱԺ նախագահի տեղակալ Ռուբեն Ռուբինյանը տեղեկացրեց՝ մրցութային խորհրդի որոշմամբ Կոռուպցիայի կանխարգելման հանձնաժողովի անդամի թափուր պաշտոնում առաջարկվել է Վահե Մկրտչյանի թեկնածությունը:

Թեկնածուին ներկայացրեց մրցութային խորհրդի անդամ Արուսյակ Ջուլհակյանը:

Վահե Մկրտչյանը ծնվել է 1977 թվականի օգոստոսի 4-ին մանկավարժի ընտանիքում: Սովորել է Լեռնագոգի միջնակարգ դպրոցում:

1995 թվականից մնչև 2000 թվականը սովորել է Երևանի պետական տնտեսագիտական ինստիտուտի կառավարման ֆակուլտետի կառավարման բաժնում:

2011-ին նրան շնորհվել է տնտեսագիտության թեկնածուի գիտական աստիճան: 

Ամուսնացած է, ունի 3 զավակ:

Մկրտչյանն իր ելույթում ներկայացրեց իր տեսլականն ու  հանձնառությունը ԿԿՀ-ի աշխատանքի մասին, ընդգծեց՝ կոռուպցիայի դեմ պայքարը իրավական կամ քաղաքական խնդիր չէ, այլ ազգային անվտանգության, սոցիալական արդարության և մեր պետության ապագայի հարց:

Նրա խոսքով՝ իր գործունեության առանցքը լինելու է կանխարգելման մշակույթի ամրապնդումը: Թեկնածուն կարևորել է թափանցիկության և հաշվետվողականության մեխանիզմների զարգացումը, յուրաքանչյուր քաղաքացու համար առավելագույն հրապարակային և հասկանալի պետական ու տեղական ինքնակառավարման մարմինների, էթիկայի հանձնաժողովների, բարեվարքության հարցերով կազմակերպիչների և ծախսերի գործընթացների որոշումների կայացումն ու ընթացակարգերը, ռիսկերի վերլուծությունը և վաղ արձագանքումը, կոռուպցիոն ռիսկեր պարունակող ոլորտներում աշխատանքների բարելավումը:

Վահե Մկրտչյանի խոսքով՝ ազդարարման համակարգի արդյունավետության բարձրացման համար անհրաժեշտ է, որ ազդարարները լինեն պաշտպանված, իսկ հաղորդումները ողջամիտ ժամկետում և անկողմնակալ քննարկվեն:

Թեկնածուն հայտարարեց՝ կողմ է Կառավարության որդեգրած հակակոռուպցիոն քաղաքականությունը: