Կամբոջան մեղադրում է Թաիլանդին թունավոր գազի կիրառման մեջ՝ սրված սահմանային բախումների ֆոնին

Կամբոջան պաշտոնապես հայտարարել է, որ թաիլանդական բանակը սահմանային բախումների ընթացքում կիրառել է թունավոր գազ։ Ինչպես նշված է երկրի Ազգային ասամբլեայի հայտարարությունում, դեկտեմբերի 7–8-ին տեղի ունեցած ռազմական գործողությունները ներառել են F-16 կործանիչների կիրառումը, ծանր զենքի օգտագործումը և թունավոր գազի տարածումը մի շարք շրջաններում՝ մասնավորապես Պրեհ Վիհեար, Բանթեյ Միանթեյ և Օդդար Միանթեյ նահանգներում։ Կամբոջայի խորհրդարանը իրենց կողմից անվանել է դա «ագրեսիվ պատերազմ» և դատապարտել գործողությունների հետևանքով առաջացած զոհերն ու վնասները։

Սահմանային բախումները սրվել են անցած հանգստյան օրերին, և կողմերը փոխադարձաբար մեղադրում են միմյանց հրադադարի խախտման մեջ։ Թաիլանդը հայտարարել է, որ Կամբոջայի ուժերը հարվածել են Անուպոնգ ռազմաբազային և հրթիռակոծել Բուրիրամի բնակելի շրջանները։ Ի պատասխան՝ թաիլանդական բանակը օդ բարձրացրել է կործանիչներ և հարվածել է Չոնգ Ան Մա շրջանի թիրախներին։ Reuters-ի տվյալներով՝ բախումների մեկնարկից ի վեր զոհվել է առնվազն մեկ թաիլանդացի զինվոր, ևս յոթը վիրավորվել են։

Կամբոջան, իր հերթին, հայտնել է Թաիլանդի կողմից գյուղերի վրա իրականացված հարձակումների մասին՝ նշելով, որ մահացել է չորս խաղաղ բնակիչ և վնասվածքներ ստացել ևս ինը մարդ։ Երկրի պաշտպանության նախարարությունը պատասխանատվությունը դրել է Բանգկոկի վրա՝ ընդգծելով, որ իրենք չեն ձեռնարկել պատասխան հարձակումներ և շարունակում են պահպանել հրադադարի պայմանավորվածությունը։ Մայիսից սկսված սահմանային հակամարտությունը մի քանի անգամ անցել է լայնամասշտաբ ռազմական բախումների ֆազայի։ Չնայած հուլիսին ԱՄՆ-ի, Չինաստանի և Մալայզիայի միջնորդությամբ ստորագրված հրադադարին՝ իրավիճակը շարունակում է մնալ պայթյունավտանգ։