Մակրոնը հայտարարում է․ Եվրոպան ունի «հաղթաթուղթ» Ուկրաինայի շուրջ բանակցություններում

Ֆրանսիայի նախագահ Էմանուել Մակրոնը հայտարարել է, որ Եվրոպան ունի մի շարք ռազմավարական առավելություններ, որոնք կարող են դեր խաղալ Ուկրաինայի շուրջ բանակցային գործընթացում։ Ինչպես փոխանցում է The Guardian-ը, Մակրոնը նշել է, որ Եվրոպայի ձեռքին «շատ հաղթաթղթեր» կան, որոնք թույլ են տալիս մտածել հօգուտ եվրոպական կողմի հնարավոր զարգացումների մասին։

Ֆրանսիայի նախագահի խոսքով՝ եվրոպական երկրները շարունակելու են աջակցել Ուկրաինային և հանդես գալ խաղաղ կարգավորման օգտին։ Միաժամանակ նա ընդգծել է, որ անհրաժեշտ է գտնել եղանակ, որով Եվրոպան և ԱՄՆ-ը կկարողանան համադրել իրենց դիրքորոշումները՝ ապահովելու համար միասնական ու արդյունավետ գործողությունների ռազմավարություն։

Ավելի վաղ հաղորդվել էր, որ Ուկրաինայի նախագահ Վլադիմիր Զելենսկին նախատեսում է քննարկել «ռեպարացիոն վարկի» տրամադրումը ՆԱՏՕ-ի գլխավոր քարտուղար Մարկ Ռյուտտեի, Եվրահանձնաժողովի ղեկավար Ուրսուլա ֆոն դեր Լայենի և ԵԽ նախագահ Անտոնիու Կոշտայի հետ՝ հիմնվելով սառեցված ռուսական ակտիվների օգտագործման վրա։