Չինաստանն ու Հնդկաստանը կտրուկ ավելացրել են նավթի ներմուծումը Էմիրություններից

Bloomberg-ի տվյալներով՝ Չինաստանը և Հնդկաստանը վերջին ամիսներին զգալիորեն ավելացրել են նավթի գնումները Միացյալ Արաբական Էմիրություններից։ Գների նվազումը՝ վերջին հինգ տարվա ամենացածր մակարդակին, նպաստել է, որ Ռուսաստանի ԲՐԻՔՍ գործընկեր երկրները մեծացնեն իրենց ներմուծումները Պարսից ծոցի մատակարարներից։ Մասնավորապես, չինական նավթավերամշակող ընկերությունները Saudi Aramco-ից միայն հունվար ամսվա համար ձեռք են բերել մոտ 50 միլիոն բարել, ինչը ռեկորդային ցուցանիշ է 2025-ի օգոստոսից հետո։

Նավթի բարձր պահանջարկ են ցուցաբերում նաև մի շարք մասնավոր ընկերություններ՝ հատկապես Հնդկաստանում։ Reliance Industries Ltd.-ը պայմանավորվել է հունվարին ստանալ ավելի քան 10 միլիոն բարել, սակայն աղբյուրները նշում են, որ իրական մատակարարումները կարող են գերազանցել նախնական ծավալները։ Նավթի ներմուծումն աճել է նաև Mangalore Refinery & Petrochemicals Ltd. և HPCL-Mittal Energy Ltd. պետական ընկերությունների միջոցով։ Բացի այդ, Թայլանդի ու Մալայզիայի նավթավերամշակողներն էլ ընդլայնել են իրենց գնումները Մերձավոր Արևելքից։

Միևնույն ժամանակ, Չինաստանի գլխավոր մաքսային վարչությունը հայտնում է, որ վերջին 11 ամսում Ռուսաստանի կողմից մատակարարվող նավթի ներմուծումը նվազել է մոտ 6 տոկոսով։ Ընդհանուր առմամբ, Չինաստանը 33,5 տոկոսով կրճատել է արտասահմանյան ածխի, 19,3 տոկոսով՝ նավթի, ինչպես նաև մոտ 11 տոկոսով՝ պողպատի և 14,3 տոկոսով՝ գազի ներմուծումները։