Պարգևավճարը մարդիկ ընկալում են որպես աշխատավարձի բաղադրիչ. Կառավարությունը մոտիվացիայի նոր մեխանիզմ է մտածել

Կառավարության նպատակը զուտ աշխատավարձ բարձրացնելը չէ, քանի որ վարձատրությունը միայն աշխատավարձը չէ։ Այս մասին ՀՀ պետական մարմինների ներկայացուցիչների առաջին համաժողովում պանելային քննարկման ժամանակ նշեց ՝ փոխվարչապետ Տիգրան Խաչատրյանը։

«Վարձատրությունը ունի տարբեր բաղադրիչներ։ Մենք ունենք պարգևավճարների համակարգ, որն իրականում գնահատում չէ, որովհետեւ մարդիկ շատ հաճախ ձևականորեն են լրացնում գնահատականները և դրանք գործնականում որևէ քննարկման չեն ենթարկվում։

Մարդիկ արդեն սովորել են, որ այն, ինչ որ կոչվում է պարգևավճար իրենց լավ աշխատանքի դիմաց, աշխատավարձի բաղադրիչ է, որ ավելացվել է իրենց աշխատավարձին։

Հիմա մենք չենք ուզում, որ այն առաջարկությունը, որը առաջիկա օրերին կառավարությունը կքննարկի և կհաստատի, դառնա մարդկանց ընկալման մեջ հերթական աշխատավարձային մի բաղադրիչ, բայց այլ անունով, և մենք ունենանք մի քանի ամիս հետո այն նույն իրավիճակը ունեցել ենք տարիներ շարունակ։ Այստեղ պետք է շատ հստակ լինի, որ սա աշխատանքի գնահատման արդյունքում և դրա չափման դիմաց տրվող խրախուսական հավելավճար է լինելու»,– հայտարարեց փոխվարչապետ Տիգրան Խաչատրյանը։