ԵՄ դեսպանները հավանություն տվեցին ռուսական գազից հրաժարվելու ծրագրին

Եվրամիության անդամ երկրների դեսպանները հաստատել են ծրագիրը, ըստ որի՝ մինչև 2027 թվականի վերջը ԵՄ-ն ամբողջությամբ դադարեցնելու է բնական գազի գնումները Ռուսաստանից։ Ինչպես հաղորդում է Reuters-ը՝ հղումով Դանիայի նախագահի պաշտոնը զբաղեցնող պատվիրակությանը, այս որոշումը վերջին հիմնական քայլերից էր, որպեսզի արգելքը հաստատվի օրենքի ուժով։ Նախատեսվում է, որ հեղուկ գազի ներմուծումը կդադարեցվի երկու տարվա ընթացքում, իսկ խողովակաշարային գազի մատակարարումները՝ մինչև 2027-ի սեպտեմբերը։

Եվրոպական խորհրդարանը նախաձեռնությունը կքննարկի և կընդունի հաջորդ շաբաթ, իսկ վերջնական հաստատումը նախատեսվում է հաջորդ տարվա սկզբին։ ԵՄ ղեկավարությունը վստահ է, որ Հունգարիայի և Սլովակիայի դիմադրությունը չի խոչընդոտի ծրագրի անցմանը, սակայն երկու երկրներն էլ հայտարարել են, որ դատական ճանապարհով կբողոքարկեն այս որոշումը։

Նախկինում հաղորդվել էր, որ Լեհաստանը նպատակ ունի դառնալ գլխավոր եվրոպական գազային հանգույցը՝ մեծացնելով հեղուկ գազի ներմուծումը և փոխարինելով ռուսական վառելիքի մատակարարումները։ Միևնույն ժամանակ շուկան համեմատաբար հանգիստ է արձագանքում ԵՄ-ի որոշմանը․ գազի բորսայական գինը հասել է վերջին մեկուկես տարվա նվազագույն ցուցանիշներին և շարունակում է անկում արձանագրել։