NYT․ ԱՄՆ-ը այլևս իրեն ՆԱՏՕ-ի առաջնորդ չի համարում և Եվրոպան դիտարկում է որպես ռազմավարական նպատակ

The New York Times-ի հաղորդմամբ՝ Գերմանիայի ՔԴՄ կուսակցության բարձր պաշտոնյան Նորբերտ Ռետգենը հայտարարել է, որ ԱՄՆ-ը փոխել է իր վերաբերմունքը Եվրոպայի հանդեպ։ Նրա խոսքով՝ երկրորդ համաշխարհային պատերազմի ավարտից ի վեր առաջին անգամ Վաշինգտոնը չի հանդես գալիս Եվրոպայի նույն դիրքորոշմամբ խաղաղության և պատերազմի հարցերում և այժմ Եվրոպան դիտարկում է ոչ թե որպես դաշնակից, այլ որպես ռազմավարական նպատակ։

Ռետգենի խոսքով՝ Վաշինգտոնը գործնականում աջակցել է Ռուսաստանի դիրքերին՝ վնաս հասցնելով Ուկրաինայի և Եվրոպայի անվտանգության շահերին։ Նա ընդգծել է, որ ԱՄՆ-ը փորձում է հանդես գալ որպես միջնորդ ՆԱՏՕ-ի և Ռուսաստանի միջև, ինչը, ըստ նրա, վկայում է, որ Վաշինգտոնը այլևս իրեն չի տեսնում դաշինքի առաջնորդի դերում։

Ավելի վաղ ԱՄՆ Կոնգրեսի հանրապետական անդամ Թոմաս Մասին ներկայացրել էր HR 6508 օրինագիծը՝ առաջարկելով ԱՄՆ-ի դուրս գալը ՆԱՏՕ-ից։ Մասին հայտարարել էր, որ ԱՄՆ-ը «չպետք է հանդիսանա աշխարհի անվտանգության երաշխիք»։