Մանկապարտեզում 5-ամյա երեխայի վրա կապտուկներ են տեսել. նրան պարբերաբար ծեծելու համար ձերբակալվել է մայրը

Դեկտեմբերի 25-ին արտառոց դեպք է տեղի ունեցել Երևանում։

Ժամը 11։40-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Մարաշի բաժնում օպերատիվ տեղեկություններ են ստացվել, որ Երևանի մսուր-մանկապարտեզներից մեկում 5 տարեկան ավագ խումբ ընդունված տղա երեխայի նկատմամբ բռնություն է կատարվել։

Մսուր-մանկապարտեզ ժամանած ոստիկանները պարզել են, որ տեղեկությունը հավաստի է․ նրանք երեխայի վրա ամբողջությամբ հայտնաբերել են կապտուկներ, ականջը վնասված, աչքի տակ և կողքին կապտած, և երեխան դաստիարակներին հայտնել է, որ տանը եղբայրը և մայրը պարբերաբար ծեծի են ենթարկում իրեն, իսկ մանկապարտեզի տնօրենին երեխայի մայրը հայտնել է, որ երեխան կմեծանա, կմոռանա։

Ինչպես հայտնում է Shamshyan.com-ը, արդեն մսուր-մանկապարտեզում հոգեբանի ներկայությամբ երեխան պատմել է, որ իրեն վնասվածքները հասցրել է մայրը։

Ոստիկանության Մարաշի բաժնի ծառայողներին երեխայի տատիկն ասել է, որ երեխային ծեծի է ենթարկել մայրը։

Ոստիկանության Մարաշի բաժնի ծառայողների ձեռնարկած միջոցառումների արդյունքում երեխայի 36-ամյա մայրը՝ Սաթենիկ Պ․-ն, ֆիզիկական ներգործություն և ֆիզիկական, հոգեկան տառապանք պատճառելու հիմնավոր կասկածով ձերբակալվել և տեղափոխվել է ոստիկանության Մարաշի բաժին։

Դեպքի փաստով ոստիկանության Մարաշի բաժնում փաստաթղթեր են կազմվել, որոնք փոխանցվել են ՀՀ քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժին։