Փաշինյանը և 10 տիրադավերը մի պատմական քայլ արեցին, որի նպատակը Հայ եկեղեցում կազմաքանդումն ու քայքայումն է. Զուրաբյան

Հայաստանի գերագույն գլխավոր կաշառակեր, թալանչի և ավազակապետ Նիկոլ Փաշինյանը (եթե այս բնութագրումների համար հիմնավորումների կարիք ունեք, խնդրեմ, ծանոթացեք Հայաստանում համակարգային կոռուպցիայի մասին «Ազատություն» ռադիոկայանի վերջին նյութին, որը ներկայացված է իմ նախորդ գրառման մեջ), ինչպես նաև Քննչական կոմիտեի հաճախորդ, հետևաբար, մեր հոգևորական դասի ամենաանբարոյական տարրի տիտղոսը շահած տասը այսպես կոչված «տիրադավերը» հենց նոր, իրենց վերագրելով լիազորություններ, որոնց համար օժտված չեն օրենքով, հայտարարեցին կազմակերպված հանցախմբի ստեղծման մասին, որի նպատակը լինելու է Հայ Առաքելական Սուրբ Եկեղեցու կազմաքանդումն ու քայքայումը, հավատավոր հայ ժողովրդի պառակտումը, անօրենության ծավալումն ամբողջ երկրով: Այս մասին Facebook–ի իր էջում գրել է ՀԱԿ փոխնախագահ,  ՀԱԿ վարչապետի թեկնածու Լևոն Զուրաբյանը, ով իր գրառումը վերնագրել է «Երկրի ժանտախտը»։

Նա, մասնավորապես, նշել է. «Փաշինյանն այսպիսով այսօր կատարեց մի պատմական քայլ, որով նա հավերժ կհիշվի որպես հայոց պետականության ու ինքնության կազմաքանդման և քայքայման ամենահետևողական ու նվիրյալ «ռահվիրաներից» մեկը:

Քիչ էր 2019 թվականի խաղաղության պլանի մերժումը և Հայաստանի ներքաշումը կործանարար պատերազմի մեջ, քիչ էր 5000 զինվորների կյանքի զոհաբերությունը, քիչ էր Արցախի ոչնչացումը: Այսօրվանից հայ ժողովրդի դեմ կատարած նրա չարագործությունների ցուցակին կավելանա Հայ Առաքելական Սուրբ Եկեղեցու հերձվածումը, հավատավոր ժողովրդի կյանքի պղծումը:

Սա իրականում մեծ օտարածին ծրագիր է, որը պետք է խափանվի»։