Զախարովան արձագանքել է ՀԱՊԿ–ի վերաբերյալ Փաշինյանի մեղադրանքներին

Ռուսաստանի արտաքին գործերի նախարարության խոսնակ Մարիա Զախարովան ՀՀ վարչապետ Նիկոլ Փաշինյանի՝ ՀԱՊԿ-ի դեմ ուղղված վերջին մեղադրանքները որակել է որպես «բառերի կույտ»։

Հունվարի 30-ին ճեպազրույցի ժամանակ, երբ նրան խնդրել են մեկնաբանել Փաշինյանի կողմից ՀԱՊԿ-ի դեմ ուղղված մեղադրանքները, Զախարովան, մասնավորապես, ասել է. «Դա ինչ–որ բառերի կույտ է, ներեցեք։ Նա ՀԱՊԿ-ին մեղադրո՞ւմ է հայկական պետականության ոչնչացման մեջ։ Ինձ համար պարզապես տարօրինակ է լսել այդ ամենը։ Գուցե նրան սխալ եք մեջբերում։ Եկե՛ք հստակեցնենք մեջբերումը»։

Լրագրողի այն դիտարկմանը, որ ինքը բառացիորեն է մեջբերել Փաշինյանի խոսքերը, ռուս դիվանագետը նշել է, որ անհասկանալի է, թե ինչի մասին է խոսքը, այդ թվում՝ տարածքային ամբողջականության վերաբերյալ։ «Հասկանում եմ, որ այս ամենը ասվել է Լեռնային Ղարաբաղի շուրջ ստեղծված իրավիճակի համատեքստում։ Ես չեմ հիշում, որ այդ տարածքը օրինականորեն հայտարարվել է Հայաստանի մաս։ Ես միայն հիշում եմ, թե ինչպես էր Նիկոլ Վովաևիչ Փաշինյանը գնացել այնտեղ [Լեռնային Ղարաբաղ – խմբ.] և պարել։ Ես հիշում եմ դա, բայց ոչինչ չգիտեմ որևէ տեսակի իրավական ճանաչման կամ Հայաստանի՝ որպես պետության մեջ ընդգրկվելու մասին։ Գուցե դուք լսե՞լ եք», - հարցրել է Զախարովան։

Նա ևս մեկ անգամ առաջարկել է ուսումնասիրել այդ հարցը՝ հավելելով, որ, սակայն, չի հասկանում, թե ինչպիսի սպառնալիք կարող է ներկայացնել ՀԱՊԿ-ը հայկական պետականությանը։ Դիվանագետը խոստացել է մեկնաբանել, երբ հասկանա, թե ինչ է կատարվում։