Արշակ Սրբազանին տեսակցել եմ, տրամադրությունը շատ լավ էր. պաշտպան

Ի սկզբանե անհիմն էր Արշակ արքեպիսկոպոս Խաչատրյանի կալանքը բավարարելը և հույս ունեմ, որ այսօր գոնե որոշակի փոփոխություն կլինի Սրբազանի խափանման միջոցի պարագայում: Հասկանալի է՝ ինչ է կատարվում մեր երկրում, ամբողջ իրավական համակարգում՝ ճնշումները դատավորների նկատմամբ ԲԴԽ համակարգի կողմից, բայց ինչևէ՝ հույս ունեմ: Այս մասին լրագրողների հետ զրույցում ասել է Մայր աթոռի դիվանապետ Արշակ Սրբազանի պաշտպան Հարությունյանը։

Հարցին, թե արդյոք Արբազանի գործով իրեղեն ապացույցը անհետացել է և արդյոք դա կարող է ընդհանուր դատական գործընթացի վրա ազդել, փաստաբանը պատասխանել է․

«Այս պահին որևէ ստույգ պաշտոնական ինֆորմացիա չկա, թե արդյոք դա համապատասխանում է իրականությանը, թե ոչ։ Կփորձեմ, ամեն դեպքում, այսօր քննիչներից ճշտել»:

Հարությունյանը նշել է, որ 2 օր առաջ է տեսակցել Արշակ Սրբազանին, «տրամադրությունը, ինչպես միշտ, լավ էր»․ 

«Կարելի է ասել՝ հումորով է վերաբերվում, եթե ոչ հեգնանքով՝ հասկանալով, որ այս ամենի նպատակը և պատճառը սրբազաններին՝ Բագրատ Սրբազանին, Միքայել Սրբազանին, Մկրտիչ Սրբազանին, մեկուսացնելն է, որպեսզի այն արշավը, որ տեղի է ունենում Հայ առաքելական սուրբ եկեղեցու դեմ, իրականացվի ավելի մեծ թափով, որովհետև այդ անազատության մեջ գտնվող սրբազանները, պարզ է, որ իրենց դիրքով, իրենց հեղինակությամբ, ժողովրդի մոտ վայելած հեղինակությամբ․ առաջին հերթին․ կկարողանային կանխել այս արշավը և դրա համար իրենք անազատության մեջ են»: