Թրամփը շնորհակալություն է հայտնել Հետաքննությունների դաշնային բյուրոյին

ԱՄՆ նախագահ Դոնալդ Թրամփը հեռախոսազրույց է ունեցել Ջորջիա նահանգի Ֆուլտոն շրջանում 2020 թվականի նախագահական ընտրություններին վերաբերող նյութերը վերանայող ՀԴԲ գործակալների հետ և շնորհակալություն է հայտնել նրանց աշխատանքի համար, հաղորդում է ABC News-ը՝ հղում անելով աղբյուրներին։

Հեռուստաալիքի տվյալներով՝ զրույցը կազմակերպել է Ազգային հետախուզության տնօրեն Թալսի Գաբարդը։ Նախագահ Դոնալդ Թրամփը գործակալների հետ խոսել է բարձրախոսով և շնորհակալություն է հայտնել նրանց Ջորջիա նահանգի ընտրությունները վերանայելու և հետաքննելու իրենց աշխատանքի համար։

Խոսքը վերաբերում է Ֆուլտոն շրջանում ՀԴԲ-ի կողմից իրականացվող հետաքննությանը։ Տեղական իշխանությունների տվյալներով՝ դաշնային դատավորի կողմից հաստատված օրդեր ստանալուց հետո գործակալները առգրավել են մոտ 700 տուփ քվեաթերթիկ և 2020 թվականի ընտրություններին վերաբերող այլ նյութեր։ Աղբյուրները պնդում են, որ վերանայումն իրականացվում է մանրամասն՝ «քվեաթերթիկ առ քվեաթերթիկ»՝ հնարավոր խախտումները բացահայտելու համար։