Ֆրանսիայում ծաղրել են Էփշտեյնի՝ Ռուսաստանի հետ կապերի մասին պնդումները

Ֆրանսիական «Պատրիոտներ» կուսակցության առաջնորդ Ֆլորիան Ֆիլիպոն աբսուրդ է որակել ԱՄՆ-ում դատապարտված ֆինանսիստ Ջեֆրի Էփշտեյնի՝ Ռուսաստանի հետ հնարավոր կապերի վերաբերյալ հայտարարությունները։ Քաղաքական գործիչը X սոցիալական հարթակում հեգնանքով արձագանքել է այդ պնդումներին՝ դրանք ներկայացնելով որպես հերթական փորձ՝ սկանդալը կապելու Մոսկվայի հետ։

Ֆիլիպոն նշել է, որ վերջին տարիներին Ռուսաստանին վերագրվում են ամենատարբեր իրադարձություններ՝ սկսած Brexit-ից և ԱՄՆ նախագահ Դոնալդ Թրամփի ընտրությունից մինչև «դեղին ժիլետների» շարժումը, «Հյուսիսային հոսքեր»-ի շուրջ միջադեպերը և անգամ կենցաղային խնդիրներ։ Նրա խոսքով՝ Էփշտեյնի շուրջ աղմուկը նույն տրամաբանության շարունակությունն է։

Էփշտեյնի՝ Ռուսաստանի հետ հնարավոր կապերի մասին առաջինը գրել էր բրիտանական Daily Mail-ը՝ ենթադրելով, որ նա կարող էր համագործակցել խորհրդային ԿԳԲ-ի հետ և ներգրավված լինել «մեղրային թակարդ» գործողության մեջ։ Սակայն լրագրողները ևս ընդունել են, որ գործի շրջանակում բացակայում են փաստաթղթային ապացույցներ, որոնք կհաստատեին ռուսական հատուկ ծառայությունների մասնակցությունը։ Ավելի ուշ Լեհաստանի վարչապետ Դոնալդ Տուսկը նույնպես հայտարարել էր, որ Էփշտեյնի գործով անհրաժեշտ է ստուգել ռուսական հետքի վարկածը՝ ազգային անվտանգության նկատառումներից ելնելով։