Lufthansa-ն 100-ամյակի կապակցությամբ վերաիմաստավորում է իր նացիստական անցյալը

Գերմանական ավիափոխադրող Lufthansa-ն, նշելով իր հիմնադրման 100-ամյակը, հայտարարել է նացիստական շրջանի իր պատմության նկատմամբ ավելի մեծ պատասխանատվություն ստանձնելու մասին։ Reuters-ի փոխանցմամբ՝ ընկերությունը հրաժարվում է նախկին մոտեցումից, ըստ որի՝ փորձում էր հստակ տարանջատել պատերազմից առաջ և հետո ձևավորված իր ինքնությունը՝ ընդունելով, որ անցյալի մութ էջերը անտեսելը ազնիվ չէր լինի։

Lufthansa-ի գլխավոր տնօրեն Կարշտեն Շփոր-ը լրագրողներին ասել է, որ ընկերությունը հպարտ է ներկայիս ձեռքբերումներով, սակայն անցյալի դժվար ու ողբերգական տարիները շրջանցելը կեղծ մոտեցում կլիներ։ Նշվում է, որ առաջին «Deutsche Luft Hansa»-ն սերտորեն ինտեգրված էր նացիստական վարչակարգին, զբաղվում էր նաև ռազմական արտադրությամբ և 1946-ին դադարեցրել էր գործունեությունը, իսկ հետպատերազմյան Lufthansa-ն հիմնադրվել է 1953-ին։

Ընկերությունը նոր քայլերի շրջանակում պատրաստել է իր պատմության մասին գիրք, որը կբաշխվի ավելի քան 100 հազար աշխատակիցների շրջանում, ինչպես նաև կկազմակերպվի ցուցահանդես նոր այցելուների կենտրոնում։ Պատմաբան Մանֆրեդ Գրիգերի տվյալներով՝ նացիստական շրջանում Lufthansa-ի ռազմական արտադրությունում և սպասարկման աշխատանքներում շահագործվել է ավելի քան 12 հազար մարդ, այդ թվում՝ երեխաներ, փաստ, որը լիարժեքորեն բացահայտվել է միայն վերջին տարիներին։