Լիտվայում հայտարարել են, թե ինչ պայմաններում կարող է Ռուսաստանը կորցնել Կալինինգրադը

Լիտվայի զինված ուժերի պաշտպանության շտաբի պետ, կոնտր-ծովակալ Գեդրյուս Պրեմենեցկասը հայտարարել է, որ Ռուսաստանի համար Կալինինգրադի մարզի պահպանումը կարող է դառնալ լուրջ խնդիր՝ ՆԱՏՕ-ի հետ զինված հակամարտության դեպքում։ Այդ մասին նա ասել է The Wall Street Journal-ին տված հարցազրույցում։

Պրեմենեցկասի խոսքով՝ ՆԱՏՕ-ն պետք է հստակ ազդակ ուղարկի, որ նման սցենարի դեպքում Ռուսաստանը կարող է կորցնել Կալինինգրադը։ Նա նշել է, որ Լիտվան ունի բավարար կարողություններ՝ ինքնուրույն զսպելու ռուսական ուժերը, առնվազն սահմանափակ ծավալներով գործողությունների դեպքում։

Լիտվայի պաշտպանության շտաբի պետի գնահատմամբ՝ երկրի զինված ուժերը խաղաղ ժամանակ կազմում են մոտ 17 հազար զինծառայող, իսկ անհապաղ մոբիլիզացիայի դեպքում՝ մինչև 58 հազար։ Ավելի վաղ Լիտվայի ազգային անվտանգության հարցերով խորհրդական Դեյվիդաս Մատուլիոնիսը հայտարարել էր, որ երկիրը պատրաստվում է հնարավոր ներխուժման սցենարներին և պատրաստ է դիմակայել մինչև դաշնակիցների ուժերի ժամանումը։