«Հայաստանի ներքին գործն է». Ալեն Սիմոնյանը ընդդիմության նկատմամբ հետապնդման մասին

Ես կարծում եմ, որ Հայաստանը` որպես ինքնիշխան պետություն, հավասարակշռված քաղաքականություն վարելու իրավունք ունի,– լրագրողների հետ զրույցում ասել է ՀՀ ԱԺ նախագահ Ալեն Սիմոնյանը։

«Հայաստանը չի պատրաստվում անցնել որևէ մեկի կողմը կամ աշխատել որևէ մեկի դեմ»,– նշել է նա՝ հավելելով, որ այդ մասին խոսել է նաև ռուս գործընկերների հետ։

«Հայաստանը ունի իր արտաքին քաղաքականությունը, իր տեսլականը, հատկապես 2020 թվականի պատերազմից հետո։ Կարծում եմ՝ ձեր բարձրաձայնած հարցերի պատասխանները կարող ենք գտնել այն ամենում, ինչ տեղի է ունեցել 2020 թվականից հետո։ Ընկալումը, թե Հայաստանը փորձում է փոխել իր կուրսը մեկ բևեռից դեպի մյուս բևեռ, սխալ է։ Հայաստանը չի գտնվելու որևէ բևեռում և չի գտնվելու նաև հակառակ բևեռում»,– ասել է ԱԺ նախագահը։

Անդրադառնալով Հայաստանում ընդդիմադիր քաղաքական ու հասարական գործիչների նկատմամբ հետապնդումների մասին հարցին՝ ԱԺ նախագահը նշել է․

«Ես ներողություն եմ խնդրում, բայց ինչո՞ւ պետք է ես մեկնաբանեմ, թե ինչպես է Հայաստանի Քրեական օրենսգիրքը կիրառվում Հայաստանի Հանրապետության քաղաքացիների նկատմամբ։ Դա Հայաստանի ներքին գործն է։ Մարդիկ, ովքեր խախտում են Քրեական օրենսգիրքը, պետք է պատասխանատվություն կրեն։ Իսկ երբանից դա քաղաքական դարձավ՝ ես լսել եմ միայն մեր որոշ ընդդիմադիր գործիչներից և հենց նոր՝ ձեզանից։ Որտեղի՞ց եք վերցրել, որ դրանք քաղաքական գործողություններ են։ Այսինքն՝ իշխանության զավթմամբ սպառնալը, անկարգություններ կազմակերպելը, սպանություն կամ ենթադրյալ սպանություն նախապատրաստելը՝ վարչապետի, նախարարների, իմ և արտաքին գործերի նախարարի նկատմամբ, ե՞րբվանից դարձավ քաղաքական»,– ասել է Սիմոնյանը։