Պատժամիջոցները նպաստել են Իրանում բողոքների աճին. ԱՄՆ ֆինանսների նախարարություն

ԱՄՆ ֆինանսների նախարար Սքոթ Բեսենթը հայտարարել է, որ Վաշինգտոնի խիստ պատժամիջոցային քաղաքականությունը նպաստել է Իրանում տնտեսական ճգնաժամի խորացմանը և բողոքների ակտիվացմանը։ Նրա խոսքերը փոխանցում է ՌԻԱ Նովոստին։

Բեսենթի խոսքով՝ ԱՄՆ ֆինանսների նախարարության գործողությունները հանգեցրել են Իրանում դոլարի պակասի, ինչը դարձել է տնտեսական լարվածության և զանգվածային բողոքների կարևոր գործոններից մեկը։ Նա նշել է, որ 2025 թվականին Նյու Յորքի տնտեսական ակումբում ներկայացված ռազմավարության արդյունքում սնանկացել է իրանական խոշոր բանկերից մեկը՝ Ayandeh Bank-ը, իսկ երկրի կենտրոնական բանկը ստիպված է եղել մեծացնել դրամական զանգվածը, ինչը արագացրել է գնաճը։

Պատժամիջոցների հետևանքով արժեզրկվել է նաև Իրանի ազգային արժույթը՝ ռիալը, իսկ նավթի վաճառքից ստացվող արտարժութային եկամուտները նվազել են։ Վերլուծաբանները որպես հնարավոր պատասխան քայլ նշում էին Օրմուզի նեղուցի փակումը, ինչը կարող էր բարձրացնել նավթի համաշխարհային գները, սակայն Իրանի իշխանությունները դեռ նախընտրում են դիվանագիտական լուծումներ որոնել Վաշինգտոնի հետ հարաբերություններում։