ԱՄՆ-ը նախատեսում է սկսել ՄԱԿ-ին ունեցած պարտքերի մարումը

ԱՄՆ-ը մոտ ժամանակներում կկատարի առաջին վճարումը ՄԱԿ-ին ունեցած բազմամիլիարդ պարտքերի շրջանակում։ Այս մասին հայտարարել է ՄԱԿ-ում ԱՄՆ դեսպան Մայք Ուոլցը՝ ընդգծելով, որ վճարումը կդառնա «զգալի նախավճար» տարեկան անդամավճարների համար։ Նրա խոսքով՝ վերջնական գումարը դեռ հստակեցված չէ, սակայն առաջին փոխանցումը սպասվում է առաջիկա շաբաթներին։

ՄԱԿ-ի տվյալներով՝ կազմակերպության հիմնական բյուջեին չվճարված գումարների ավելի քան 95 տոկոսը բաժին է ընկնում ԱՄՆ-ին։ Փետրվարի սկզբի դրությամբ Վաշինգտոնը պարտք է մոտ 2.19 միլիարդ դոլար հիմնական բյուջեի համար, ևս շուրջ 2.4 միլիարդ դոլար՝ խաղաղապահ առաքելությունների, և մոտ 43.6 միլիոն դոլար՝ միջազգային տրիբունալների ֆինանսավորման համար։ Դեկտեմբերի վերջին ԱՄՆ նախագահ Դոնալդ Թրամփը ստորագրել էր ծախսերի մասին օրենք, որը ներառում է մոտ 3.1 միլիարդ դոլար ՄԱԿ-ին և այլ միջազգային կազմակերպություններին վճարումների համար։

Միաժամանակ ԱՄՆ-ը շարունակում է պնդել ՄԱԿ-ի բարեփոխումների անհրաժեշտությունը՝ ընդգծելով կազմակերպության արդյունավետության բարձրացման և բյուրոկրատիայի կրճատման կարևորությունը։ ՄԱԿ-ի գլխավոր քարտուղար Անտոնիու Գուտերեշը նախազգուշացրել էր, որ չվճարված անդամավճարների պատճառով կազմակերպությունը կարող է ֆինանսական լուրջ խնդիրների առաջ կանգնել արդեն այս տարվա կեսերին։