Զինծառայությո՞ւն, թե՞ մարզական ուղի հավաքականում. Առաջարկվում է փոխել ֆուտբոլիստների տարկետման կանոնները

Հայաստանի կառավարությունը նախաձեռնել է իրավական փոփոխությունների փաթեթ, որն ուղղված է ֆուտբոլիստներին պարտադիր զինվորական ծառայության զորակոչից ազատման և տարկետման տրամադրման գործընթացների հստակեցմանը։ 

Առաջին նախագիծը, որը վերաբերում է N 89-Ն որոշմանը, ըստ հիմնավորման, խոչընդոտում էր որոշ մարզիկների ընդգրկումը ազգային հավաքականներում։ Գործող կարգավորմամբ՝ զորակոչից ազատվելու հնարավորություն ունեին միայն այն անձինք, ովքեր ՀՀ քաղաքացիություն էին ստացել որոշակի ընթացակարգով։ 

Հիմնավորման համաձայն՝ գործող իրավակարգավորումները թույլ էին տալիս զինծառայությունից ազատել միայն այն մարզիկներին, ովքեր քաղաքացիություն էին ստացել ընդհանուր հիմունքներով: Սակայն այն մարզիկները, այդ թվում՝ սփյուռքահայերը, որոնք քաղաքացիություն են ձեռք բերում այլ հիմքերով (օրինակ՝ ազգությամբ հայ լինելու հանգամանքով), դուրս էին մնում այս արտոնությունից, ինչն էլ խոչընդոտում էր նրանց մուտքը հավաքական։

Փոփոխությամբ նախատեսվում է ազատման իրավունքը տարածել բոլոր այն մարզիկների վրա, ովքեր ձեռք են բերել քաղաքացիություն՝ անկախ իրավական հիմքից, օրինակ՝ ծագումով հայ լինելու կամ քաղաքացիության վերականգնման դեպքում։

Միաժամանակ, երկրորդ նախագիծը վերաբերում է տարկետման տրամադրման կարգին և ֆուտբոլի կառուցվածքային առանձնահատկություններին։

Գործող կարգում առկա «պատանեկան» և «երիտասարդական» ընդհանուր սահմանումները փոխարինվում են միջազգային պրակտիկայում ընդունված Մ-19 և Մ-21 տարիքային խմբերով։ 

Նախագծի հեղինակները նշում են, որ զինծառայությունից տարկետման նախկինում սահմանված քվոտաները չէին ապահովում մարզիկների բնականոն աճը. 

«...երիտասարդական հավաքականում ավելի մեծ թվով մարզիկներ ընդգրկելու անհրաժեշտություն է առաջանում, որոնց մարզումային պրոցեսի անընդհատությունը ապահովելու միջոցով է միայն հնարավոր նրանցից որոշներին ազգային հավաքականի կազմում ընդգրկելը։ Հետևաբար... ըստ դրանց համապատասխան թվով մարզիկների տարկետում տրամադրելը չի նպաստում ի սկզբանե կարգով սահմանված նպատակի իրականացմանը»։ 

Բացի այդ, տարկետման ժամկետն այսուհետ պետք է ուղիղ կապ ունենա հավաքականի անդամ լինելու կարգավիճակի հետ. եթե մարզիկը դադարում է լինել տվյալ տարիքային հավաքականի անդամ, տարկետման հիմքը կարող է վերանայվել։

Նշվում է, որ սա թույլ կտա ավելի արդյունավետ ներգրավել սփյուռքահայ մարզիկներին և խուսափել այնպիսի դեպքերից, երբ հեռանկարային ֆուտբոլիստը զրկվում է հավաքականում հանդես գալուց բյուրոկրատական կամ տերմինաբանական անճշտությունների պատճառով։