5 տարի սպասելուց հետո ծնողները պահանջում են 44-օրյա պատերազմի գաղտնի զեկույցի բացահայտումը

Այսօր՝ 927 ստորագրությամբ հատուկ նամակով, ԱԺ էին եկել 44-օրյա պատերազմում անհետ կորած զինծառայողների հարազատները՝ պահանջով, որ իրենց տրամադրեն Անդրանիկ Քոչարյանի գլխավորած ԱԺ քննիչ հանձնաժողովի զեկույցը, որը պիտի պարունակի պատերազմի պարտության և կորուստների մեղավորների անունները։ Նրանց մինչ օրս չեն պարզաբանել հանձնաժողովի բացահայտածը, ու իրենք չեն հասկանում՝ առհասարակ ինչու է զեկույցը մինչ օրս գաղտնի պահվում հանրությունից։

«Դեռևս 2025 թ. դեկտեմբերի 29-ին ենք մուտք արել շուրջ հազար ստորագրությունով դիմում՝ ուղղված ԱԺ նախագահին, բայց մինչ օրս դիմումը մակագրած անհետ կորածների ծնողներին ու հասարակական կազմակերպություններին արհամարհել են։ Ամբողջ հայ հանրությունն էլ է արհամարհված, տեղյակ չէ՝ ինչ է իրականում տեղի ունեցել 2020-ի սեպտեմբեր-հոկտեմբեր ամիսներին Արցախում»,— ԱԺ-ում լրագրողների հետ զրույցում ասել է անհետ կորածի հարազատ Արսեն Ղուկասյանը։

Դիմումատուները երկու ժամ շարունակ ԱԺ ընդունարանում նստած են մնացել, սակայն այդպես էլ նրանց հարկ չի համարել ընդունել ԱԺ նախագահը կամ ՔՊ-ական պատգամավոր Անդանիկ Քոչարյանը, ով նախագահում է ԱԺ պաշտպանության և անվտանգության հարցերի մշտական հանձնաժողովը և ամբողջությամբ տիրապետում է գաղտնի համարվող զեկույցի բոլոր մանրամասներին։

Արսեն Ղուկասյանի եղբայրը զոհվել է պատերազմի ընթացքում, իսկ եղբորորդին անհետ կորել։ Նա այժմ ուզում է ծանոթանալ զեկույցին՝ հասկանալու համար, արդյո՞ք կգտնի այս 5 տարիների ընթացքում իր մոտ առաջացած հարցերի պատասխանը։

«Կրկին ծնողների հանդեպ արհամարհանք է ցուցաբերվում։ Ծնողներն ինչքա՞ն պետք է սպասեն։ Սա հանրությանը հետաքրքրող թեմա է, բայց ոչ լսումներ են կազմակերպում՝ կողմերի ներգրավմամբ, և ոչ էլ որևէ պարզաբանում են տալիս։ Սա արհամարհանք է բոլորի նկատմամբ»,— զայրացած դժգոհում էին անհետ կորածների հարազատները։

Վերջում դիմումատուները ստիպված մեկ անգամ ևս կրկնեցին իրենց նամակ-դիմումը՝ ուղարկելով ԱԺ նախագահին, ով երկու ամիս շարունակ անտեսել էր 927 հոգու անունից ստացված պահանջ-նամակը։