Օլիմպիական խաղերի հաղթողները բողոքել են մեդալների որակից

Իտալիայում կայացած Օլիմպիական խաղերի հաղթողներն ու մեդալակիրները բողոքել են, որ իրենց մեդալները սկսել են փշրվել մրցանակաբաշխությունից հետո։ Այս մասին հաղորդել է BBC-ն: 

Ամերիկացի լեռնադահուկորդ Բրիզի Ջոնսոնը լեռնադահուկային մրցումներից հետո մամուլի ասուլիսում խոսել է իր մեդալի հետ կապված խնդրի մասին: Նա լրագրողներին ցույց է տվել մեդալի վիճակը. ժապավենին միացնող ամրակը պոկվել էր:

Նույնն էր տեղի ունեցել նաև ամերիկացի գեղասահորդուհի Ալիսա Լյուի մեդալի հետ, ով թիմային մրցումներում նվաճել էր օլիմպիական ոսկե մեդալ։ Նա սոցիալական ցանցերում տեսանյութ է հրապարակել՝ հայտարարելով, որ իր մեդալը ժապավենի կարիք չունի։

Կազմակերպչական կոմիտեի ներկայացուցիչ Անդրեա Ֆրանչիզին հայտարարել է, որ արդեն հետաքննում են միջադեպը։ «Մենք լիովին տեղյակ ենք իրավիճակից։ Մենք փորձում ենք պարզել խնդրի ճշգրիտ բնույթը», - բացատրել է նա։

«Մենք հատուկ ուշադրություն կդարձնենք մեդալներին։ Իհարկե, մենք ուզում ենք, որ մեդալների շնորհման ժամանակ ամեն ինչ կատարյալ լինի, քանի որ սա մարզիկների համար ամենակարևոր պահերից մեկն է», - հավելել է նա։