ԱՄՆ-ն կոշտ հարվածներ կհասցնի թմրանյութերի հետ կապված ցամաքային թիրախներին. Թրամփ

ԱՄՆ-ի զինված ուժերը կհարվածեն թմրանյութերի ապօրինի շրջանառության հետ կապված ցամաքային թիրախներին։ Այս մասին հայտարարել է ԱՄՆ նախագահ Դոնալդ Թրամփը Fox Business-ին տված հարցազրույցում։

«Նախ մենք գործ ունեցանք նավակների հետ։ Հիմա նավակներ չեն մնացել, և մենք շատ ուժեղ կհարվածենք ցամաքում», - ասել է նա։

Փետրվարի 4-ին Կոլումբիայի նախագահ Գուստավո Պետրոն Թրամփին է հանձնել երկրից դուրս բնակվող թմրավաճառների ցուցակը համատեղ հետապնդման համար։ Նա նշել է, որ միջազգային թմրանյութերի ապօրինի շրջանառությունը հաղթահարելու համար նախ պետք է ձերբակալվեն այդ հանցավոր ցանցերի առաջնորդները։

Հունվարի 20-ին Թրամփը հայտարարել է, որ ԱՄՆ-ն գրեթե 100%-ով վերացրել է ծովով երկիր մտնող թմրանյութը։ Նա ասել է, որ Վաշինգտոնը այժմ կսկսի պայքարել ցամաքով երկիր մտնող թմրանյութերի ապօրինի շրջանառության դեմ։