Հնարավոր են ռուս-ուկրաինական բանակցություններ Մոսկվայում

Ուկրաինական պատվիրակությունը չի բացառել Ռուսաստանի նախագահ Վլադիմիր Պուտինի հետ բանակցությունների անցկացումը Մոսկվայում։ Այս մասին հայտնել է Ukraine context Telegram-ալիքը՝ հղում անելով վերջին բանակցություններին, որոնք տեղի են ունեցել Աբու Դաբիում։

Հրապարակման համաձայն՝ հանդիպման ընթացքում նշվել է, որ բանակցությունները շարունակաբար տարբեր երկրներում կազմակերպելու փոխարեն անհրաժեշտ է քննարկումներ անցկացնել այն վայրում, որտեղ կարող են ընդունվել հիմնական որոշումները։ Միևնույն ժամանակ հաղորդվում է, որ պատվիրակության անվտանգության ապահովման հարցում կարող են ներգրավվել ամերիկացի բանակցողներ՝ ԱՄՆ նախագահի հատուկ ներկայացուցիչ Սթիվեն Ուիթքոֆը և Ջարեդ Քուշները։

Ավելի վաղ Financial Times-ը գրել էր, որ Ուկրաինայի նախագահ Վլադիմիր Զելենսկին կարող է հայտարարել նախագահական ընտրությունների անցկացման մասին փետրվարի 24-ին՝ հակամարտության մեկնարկի տարելիցին։ Սակայն նշվում էր նաև, որ ընտրությունների և խաղաղության համաձայնագրի վերաբերյալ հանրաքվեի անցկացումը մինչև մայիսի կեսերը քիչ հավանական է։