Եվրոպական խորհրդարանը հաստատել է Ուկրաինային 90 մլրդ եվրոյի վարկ տրամադրելու որոշումը

Եվրոպական խորհրդարանի պատգամավորները հավանություն են տվել Եվրամիության կողմից Ուկրաինային 90 միլիարդ եվրոյի վարկ տրամադրելուն։ Այս մասին X սոցիալական ցանցում հայտարարել է Եվրոպական խորհրդարանի նախագահ Ռոբերտա Մեցոլան։

Նրա խոսքով՝ հատկացվող միջոցները կենսական աջակցություն կապահովեն Ուկրաինային՝ թույլ տալով շարունակել պետական հիմնական ծառայությունների աշխատանքը և ուժեղացնել երկրի պաշտպանունակությունը։ Մեցոլան ընդգծել է, որ Ուկրաինայի աջակցությունը միաժամանակ նպաստում է Եվրամիության անվտանգության ամրապնդմանը։

Նախօրեին հայտնի էր դարձել, որ Եվրախորհրդարանը արտահերթ քվեարկությամբ պետք է փոփոխություններ կատարի Եվրամիության բյուջեում մինչև 2027 թվականը՝ Ուկրաինային վարկ տրամադրելու նպատակով։ Որոշումը հնարավոր է դարձել այն բանից հետո, երբ ԵՄ երկրների դեսպանները փակ հանդիպման ընթացքում համաձայնեցրել էին վարկի տրամադրման մանրամասները՝ այն դիտարկելով որպես այլընտրանք ռուսական սառեցված ակտիվներով ապահովվող փոխհատուցման տարբերակին։