Օրբան․ Հունգարիան չի աջակցի Ուկրաինայի՝ ԵՄ-ին մինչև 2027-ը անդամակցելու պահանջին

Հունգարիայի վարչապետ Վիկտոր Օրբանը հայտարարել է, որ Բուդապեշտը չի աջակցի Ուկրաինայի՝ մինչև 2027 թվականը Եվրամիության անդամ դառնալու պահանջին։ Այս մասին նա գրել է X սոցիալական ցանցում՝ մեկնաբանելով Ուկրաինայի նախագահ Վլադիմիր Զելենսկու հայտարարությունները։

Օրբանի խոսքով՝ Ուկրաինայի անդամակցությունը ԵՄ-ին չի ապահովի խաղաղություն և կարող է վտանգել Եվրոպայի անվտանգությունը։ Նա ընդգծել է, որ Հունգարիան չի պատրաստվում ֆինանսավորել կամ աջակցել քայլերի, որոնք, իր գնահատմամբ, կարող են սպառնալիք լինել երկրի անվտանգության համար։

Ավելի վաղ Հունգարիայի վարչապետը նշել էր, որ Եվրամիության անդամակցության պայմանները սահմանում են անդամ պետությունները, ոչ թե թեկնածու երկրները, և այդ հարցում վերջնական որոշումները կախված են հենց ԵՄ երկրների դիրքորոշումից։