Հունգարիան մեղադրում է Զելենսկուն ընտրություններին միջամտելու մեջ՝ նավթի մատակարարումների շուրջ վեճի ֆոնին

Հունգարիայի արտաքին գործերի նախարար Պետեր Սիյարտոն հայտարարել է, որ Ուկրաինայի նախագահ Վլադիմիր Զելենսկին արգելափակել է Ռուսաստանից Հունգարիա նավթի մատակարարումները «Դրուժբա» նավթատարով՝ քաղաքական նպատակներով։ Այս մասին հաղորդում է ՏԱՍՍ-ը։ Բուդապեշտի պաշտոնական դիրքորոշմամբ՝ նման քայլը կարող է վտանգել երկրի էներգետիկ անվտանգությունը և ազդել առաջիկա խորհրդարանական ընտրությունների վրա։

Սիյարտոյի խոսքով՝ նավթատարը տեխնիկապես պատրաստ է մատակարարումների վերականգնմանը, սակայն Կիևը քաղաքական որոշմամբ չի թույլատրում դրանց շարունակումը։ Հունգարիայի արտաքին գործերի նախարարը այս քայլը բնորոշել է որպես «կոպիտ միջամտություն» երկրի ներքաղաքական գործընթացներին և ընդգծել, որ կառավարությունը, անկախ իրավիճակից, ապահովելու է սպառողների էներգամատակարարումը։

Հունգարիայում խորհրդարանական ընտրությունները նախատեսված են ապրիլի 12-ին։ Վերջին սոցիոլոգիական հարցումների համաձայն՝ առաջատար դիրքերում գտնվում է ընդդիմությունը, ոչ թե վարչապետ Վիկտոր Օրբանի ղեկավարած իշխող կուսակցությունը։ Վերլուծաբանների գնահատմամբ՝ ընդդիմության հնարավոր հաղթանակը կարող է լուրջ ազդեցություն ունենալ Հունգարիայի և Ռուսաստանի հարաբերությունների վրա։