Խուզարկում են պրոֆեսոր Արմեն Չարչյանի աշխատասենյակը. ի՞նչ է կատարվում «Իզմիրլյան» ԲԿ–ում

Այսօր վաղ առավոտից իրավապահ մարմինները խուզարկություն են իրականացնում «Իզմիրլյան» բժշկական կենտրոնի տնօրենի՝ Արմեն Չարչյան աշխատասենյակում։

Euromedia24-ի տեղեկություններով՝ առգրավվել են գլխավոր հաշվապահի և հաշվետարի համակարգիչները։ Խուզարկությունը շարունակվում է արդեն շուրջ երեք ժամ։

ԲԿ-ի մամուլի խոսնակ Աննա Դեմիրճյանը Euromedia24-ի հետ զրույցում հայտնել է, որ առավոտից իրավապահները գտնվում են տնօրենի աշխատասենյակում, որի դուռը փակ է։
Դեմիրճյանը նշել է, որ Արմեն Չարչյանն այսօր նախատեսված վիրահատություններ պետք է իրականացներ, սակայն դրանք կիրականացվեն այլ մասնագետների կողմից, որպեսզի բուժառուների սպասարկումը չխաթարվի։

Քննչական կոմիտեից տեղեկացրել են միայն, որ «քրեական վարույթի նախաքննության ընթացքում կատարվում են քննչական գործողություններ»՝ այլ մանրամասներ այս փուլում չհայտնելով։

Նշենք, որ «Իզմիրլյան» ԲԿ-ում բուժում է ստանում Միքայել սրբազանը։
Ավելի վաղ փաստաբան Ռուբեն Մելիքյանը հայտարարել էր, որ Հայ Առաքելական Սուրբ Եկեղեցուն պատկանող «Իզմիրլյան» ԲԿ-ում ընթացող խուզարկությունը «նիկոլական ռեժիմի հերթական ռեպրեսիան է մեր Մայր Եկեղեցու դեմ և այն որևէ կապ չունի իրավունքի գերակայության ու օրինականության հետ»։