Ռուբիոն հայտարարել է, որ ԱՄՆ-ի և Եվրոպայի ապագան անքակտելիորեն կապված է

ԱՄՆ պետքարտուղար Մարկո Ռուբիոն հայտարարել է, որ Եվրոպայի հետ հարաբերությունները շարունակում են առանցքային նշանակություն ունենալ Միացյալ Նահանգների համար, և երկու կողմերի ապագան փոխկապակցված է։ Նրա խոսքերը մեջբերում է The Guardian-ը։ Ռուբիոն ընդգծել է, որ ամերիկացիների մեծ մասը մշակութային կամ ընտանեկան կապեր ունի Եվրոպայի հետ, ինչը, ըստ նրա, ավելի է ամրապնդում երկու տարածաշրջանների միջև կապը։

Միևնույն ժամանակ ԱՄՆ պետքարտուղարը նշել է, որ Վաշինգտոնն ու եվրոպական երկրները պետք է քննարկեն, թե ինչպիսին կլինի այդ հարաբերությունների ապագան նոր աշխարհաքաղաքական պայմաններում։ Նրա խոսքով՝ անհրաժեշտ է բաց երկխոսություն՝ փոխադարձ սպասելիքները և համագործակցության ուղղությունները հստակեցնելու համար։

Ռուբիոն նաև հայտնել է, որ նախատեսում է ելույթ ունենալ Մյունխենի անվտանգության համաժողովում՝ խոսելով «փոփոխվող աշխարհի» մասին։ Նա մտադիր է շեշտել, որ աշխարհաքաղաքական նոր փուլ է սկսվել, և նախկին միջազգային համակարգն արդեն փոխվել է։