Ադրբեջանը Հայաստանի հետ խաղաղության պայմանագիր կստորագրի ՀՀ սահմանադրության փոփոխություններից հետո

Պետք է փոփոխություններ կատարվեն ՀՀ Սահմանադրության մեջ։ Հենց որ անհրաժեշտ փոփոխությունները կատարվեն, հենց հաջորդ օրը կարող ենք խաղաղության պայմանագիրը ստորագրել։ Այս մասին Մյունխենում ադրբեջանական լրատվամիջոցների հետ զրույցում կոչ է արել Ադրբեջանի նախագահ Իլհամ Ալիևը։

«Այնուամենայնիվ, ես կարծում եմ, որ Հայաստանի և Ադրբեջանի միջև արդեն իսկ խաղաղություն է հաստատվել։ Վաշինգտոնի գագաթնաժողովում ձեռք բերված պայմանավորվածությունները, այդ թվում՝ ստորագրված համատեղ հռչակագիրը և խաղաղության պայմանագրի նախաստորագրումը, փաստացի նշանակում են խաղաղության հաստատում։ Դրա ֆորմալ կողմը կախված է Հայաստանից։ Որքան շուտ Սահմանադրությունը փոփոխվի և Ադրբեջանի նկատմամբ տարածքային պահանջները վերացվեն, այնքան շուտ կստորագրվի խաղաղության պայմանագիրը»,– նշել է նա։

Ալիևը նորից կրկնել է, որ միջազգային իրավունքն այլևս չի գործում․ «Շատ երկրներ պարզապես անտեսել են այն։ Միայն միջազգային իրավունքին հենվելը բավարար չէ խնդիրները լուծելու համար։ Եվ Ադրբեջանի օրինակը իսկապես ցույց է տալիս դա։ Հետևաբար, նոր աշխարհակարգի կամ միջկառավարական հարաբերությունների նոր համակարգի ի հայտ գալը անկասկած դատապարտված էր տեղի ունենալու։ Միակ հարցն այն էր, թե ով կստանձնի այս քայլի պատասխանատվությունը։ Եվ ես կարծում եմ, որ նախագահ Թրամփը հիանալի աշխատանք է կատարել՝ նախաձեռնելով Խաղաղության խորհրդի ստեղծումը՝ մի հաստատություն, որն ունի պայծառ ապագա»։