Politico․ Մյունխենի համաժողովը ցույց է տվել ԱՄՆ-Եվրոպա հարաբերությունների ճգնաժամը

Մյունխենի անվտանգության համաժողովը ցույց է տվել, որ Միացյալ Նահանգների և Եվրոպայի միջև ձևավորված ավանդական համագործակցությունը լուրջ ճգնաժամի մեջ է։ Այդ մասին գրում է Politico պարբերականը՝ վերլուծելով փետրվարի 13-15-ը անցկացված միջազգային հանդիպման արդյունքները։

Հրապարակման մեջ նշվում է, որ թեև տրանսատլանտյան դաշինքը շարունակում է գործել, սակայն տասնամյակներով գոյություն ունեցող քաղաքական համաձայնությունը այլևս նույն ձևով չի գործում։ Կողմերը չունեն միասնական պատկերացում, թե ինչպես պետք է զարգանան հարաբերությունները ապագայում։ Լատվիայի վարչապետ Էվիկա Սիլինյան ևս ընդգծել է, որ նախկին ձևաչափով համագործակցությունը դժվար է շարունակել, իսկ եվրոպական ընկերություններից մեկի ղեկավարի կարծիքով՝ վստահության վերականգնումը կարող է երկար ժամանակ պահանջել։

Այս տարվա Մյունխենի անվտանգության համաժողովին մասնակցել են ավելի քան 50 երկրների ղեկավարներ և բարձրաստիճան պաշտոնյաներ, այդ թվում՝ եվրոպական պետությունների առաջնորդներ, Ուկրաինայի նախագահ Վլադիմիր Զելենսկին, Չինաստանի արտգործնախարար Վան Ին և ԱՄՆ պատվիրակությունը՝ պետքարտուղար Մարկո Ռուբիոյի գլխավորությամբ։ Ռուսաստանը միջոցառմանը չի հրավիրվում 2022 թվականից ի վեր։