FT․ Ռյուտտեի դիրքորոշումը ԱՄՆ-ի հարցում տարաձայնություններ է առաջացրել ՆԱՏՕ-ում և ԵՄ-ում

Եվրամիության երկրների ղեկավարներն ու ՆԱՏՕ-ի որոշ անդամներ քննադատել են դաշինքի գլխավոր քարտուղար Մարկ Ռյուտտեի մոտեցումը ԱՄՆ-ի հետ հարաբերությունների հարցում։ Այդ մասին գրում է Financial Times-ը՝ հղում կատարելով դիվանագիտական աղբյուրներին։

Հաղորդվում է, որ Մյունխենի անվտանգության համաժողովում Եվրոպական հանձնաժողովի նախագահ Ուրսուլա ֆոն դեր Լայենը հրապարակային ելույթում մեղմորեն հակադարձել է Ռյուտտեի հայտարարությանը, ըստ որի Եվրոպան չի կարող ապահովել սեփական անվտանգությունը առանց ԱՄՆ-ի աջակցության։ Նրա խոսքով՝ Եվրոպան պետք է զարգացնի սեփական հնարավորությունները և չսահմանափակվի միայն երկու տարբերակով՝ պահպանել ներկայիս վիճակը կամ բախվել պառակտման։

Աղբյուրների տվյալներով՝ ֆոն դեր Լայենի խոսքերը աջակցություն են ստացել մի շարք եվրոպացի առաջնորդների կողմից, որոնք ընդգծել են Եվրոպայի ինքնաբավության անհրաժեշտությունը։ Ավելի վաղ Ռյուտտեն հայտարարել էր, որ անվտանգության ոլորտում Եվրոպան չի կարող լիովին անկախ լինել Միացյալ Նահանգներից, ինչը դարձել է քննարկումների և տարաձայնությունների պատճառ։