Բաքվի դատարանը Ռուբեն Վարդանյանին դատապարտել է 20 տարվա ազատազրկման

Բաքվում Արցախի նախկին պետնախարար Ռուբեն Վարդանյանին «դատապարտեցին» 20 տարվա ազատազրկման։ Այս մասին հայտնում են ադրբեջանական ԱՊԱ գործակալությունը։

Ավելի վաղ, Բաքվում կազմակերպված այս շինծու դատական նիստին խոսքը տրվել էր պաշտպանական կողմին։ Պաշտպանական կողմի ելույթից, այդ թվում Վարդանյանի եզրափակիչ խոսքից հետո, նախագահող դատավոր Զեյնալ Ագաևը հարցրել է «դատավարության» կողմերին (մեղադրող և պաշտպանող կողմերին), թե արդյոք նրանք մտադիր են «դատավարությունից» հետո ներկայացնել «դատարանի վերջնական որոշման» նախնական տարբերակը։ Դրանից հետո նախագահող դատավորը հայտարարել է «դատավարության» ավարտի մասին և հեռացել խորհրդակցական սենյակ։

Հիշեցնենք, որ հունվարի 17-ից Ադրբեջանում ընթանում է շինծու դատավարություն՝ ուղղված Արցախի ռազմաքաղաքական ղեկավարության անդամների և այլ հայ գերիների դեմ։

Մեղադրյալների թվում են Արցախի նախկին նախագահներ Արկադի Ղուկասյանը, Բակո Սահակյանը և Արայիկ Հարությունյանը, Պաշտպանության բանակի նախկին հրամանատար Լևոն Մնացականյանը, նրա տեղակալ Դավիթ Մանուկյանը, նախկին արտգործնախարար Դավիթ Բաբայանը և խորհրդարանի նախկին խոսնակ Դավիթ Իշխանյանը։ Նրանց վերաբերյալ նույնպես վերջերս կայացվեցին ապօրինի դատավճիռներ՝ ցմահ ազատազրկման տեսքով։