Գերմանիան դիտարկում է Արգենտինայից հեղուկացված գազի ներմուծման հնարավորություն

Գերմանիայի իշխանությունները քննարկում են Արգենտինայից հեղուկացված բնական գազի (LNG) ներմուծման նախագիծը՝ պետական երաշխիքների տրամադրմամբ։ Այս մասին հաղորդում է Der Spiegel-ը՝ նշելով, որ ծրագրին կարող են մասնակցել պետական Sefe ընկերությունը և արգենտինական Southern Energy-ը։

Նախնական պայմանավորվածությունները կողմերի միջև ձեռք են բերվել դեռևս 2025 թվականի դեկտեմբերին։ Նախագծի համաձայն՝ տարեկան մինչև երկու միլիոն տոննա LNG կարող է մատակարարվել Գերմանիա, իսկ մատակարարումները նախատեսվում է սկսել մինչև հաջորդ տարվա ավարտը։ Եթե ծրագիրը իրականացվի, արգենտինական գազը կարող է կազմել Գերմանիայի LNG ներմուծման զգալի մասը։

Միևնույն ժամանակ Բեռլինում դեռ վերջնական որոշում չեն ընդունել պետական երաշխիքների վերաբերյալ։ Ավելի վաղ հաղորդվում էր, որ ռուսական LNG-ից հրաժարվելու ֆոնին Եվրոպայում էներգատար արդյունաբերության ծախսերը զգալիորեն աճել են, ինչի պատճառով մի շարք ընկերություններ բախվել են լուրջ տնտեսական դժվարությունների։