Գերմանիայում արգելվել է ASUS և Acer համակարգիչների վաճառքը

Գերմանիայում դատարանը ժամանակավորապես արգելել է ASUS և Acer ընկերությունների համակարգիչների վաճառքը՝ Nokia-ի արտոնագրերի հնարավոր խախտման պատճառով։ Այս մասին հայտնում է գերմանական PC Welt պարբերականը։ Արգելքը վերաբերում է ինչպես նոթբուքերին, այնպես էլ սեղանադիր համակարգիչներին։

Տեղեկությունների համաձայն՝ Nokia-ն մեղադրել է ASUS-ին, Acer-ին և Hisense-ին տեսանյութերի կոդավորման տեխնոլոգիաների հետ կապված երեք արտոնագրերի խախտման մեջ։ Hisense-ը համաձայնել է վճարել լիցենզիոն վճարներ, իսկ ASUS-ն ու Acer-ը հայտարարել են, որ ուսումնասիրում են իրավիճակը և փորձում են իրավական լուծում գտնել։ ASUS-ը նույնիսկ ժամանակավորապես փակել է իր առցանց խանութը Գերմանիայում։

Ընկերությունները նշում են, որ հարգում են մտավոր սեփականության իրավունքները և փորձում են արագ կարգավորել վեճը։ Մինչ այդ ASUS և Acer համակարգիչները դեռ կարելի է գտնել որոշ վաճառողների մոտ, սակայն պարզ չէ, թե երբ կվերականգնվի դրանց լիարժեք վաճառքը երկրում։