ԶԼՄ-ների տվյալներով՝ Զելենսկու գրասենյակը փորձել է համոզել Զալուժնիին չհրապարակել քննադատական հարցազրույցը

Ուկրաինայի նախագահի գրասենյակը փորձել է համոզել երկրի զինված ուժերի նախկին գլխավոր հրամանատար, ներկայում Մեծ Բրիտանիայում Ուկրաինայի դեսպան Վալերի Զալուժնիին հրաժարվել այն հայտարարություններից, որոնցում նա Վլադիմիր Զելենսկուն մեղադրում է 2023 թվականի հակահարձակման ձախողման մեջ։ Այս մասին Telegram-ի իր ալիքում գրել է Գերագույն ռադայի պատգամավոր Ալեքսեյ Գոնչարենկոն։

Նախօրեին Associated Press գործակալությունը հրապարակել էր Զալուժնիի հարցազրույցը, որտեղ նա նշել էր, որ ՆԱՏՕ-ի գործընկերների աջակցությամբ մշակված ռազմական ծրագիրը չի հաջողվել, քանի որ, նրա խոսքով, անհրաժեշտ ռեսուրսները չեն տրամադրվել։ Գոնչարենկոյի պնդմամբ՝ հարցազրույցի հրապարակումից առաջ նախագահի գրասենյակը մի քանի օր փորձել է համոզել Զալուժնիին հրաժարվել այդ ձևակերպումներից, սակայն նա չի փոխել իր դիրքորոշումը։ Նա նաև նշել է, որ հարցազրույցը ձայնագրվել էր մինչև Մյունխենի անվտանգության համաժողովը՝ փետրվարի 13-ից առաջ։

Ավելի վաղ քաղաքական վերլուծաբան Վլադիմիր Ժարիխինը ենթադրել էր, որ Ուկրաինայի ապագա նախագահական ընտրություններում հնարավոր թեկնածուների թվում կարող են լինել Վլադիմիր Զելենսկին, Վալերի Զալուժնին, Կիևի քաղաքապետ Վիտալի Կլիչկոն և նախկին նախագահ Պետրո Պորոշենկոն։ Նրա գնահատմամբ՝ Զալուժնին կարող է դառնալ գործող նախագահի հիմնական մրցակիցը։