ԱՄՆ-ը հայտնել է Չինաստանի ենթադրյալ միջուկային փորձարկման նոր մանրամասներ

ԱՄՆ պաշտոնյաները հայտարարել են, որ հայտնաբերվել են տվյալներ, որոնք կարող են վկայել Չինաստանի կողմից 2020 թվականին իրականացված հնարավոր ստորգետնյա միջուկային փորձարկման մասին։ Reuters-ի փոխանցմամբ՝ ԱՄՆ պետքարտուղարի օգնական Քրիստոֆեր Յուն նշել է, որ Ղազախստանում գտնվող սեյսմիկ կայանը գրանցել է մոտ 2,75 մագնիտուդով պայթյուն Լոպ Նորի փորձարկումների տարածքում՝ Չինաստանի արևմուտքում։

Յուի խոսքով՝ ստացված տվյալները չեն համապատասխանում ոչ հանքարդյունաբերական պայթյունի, ոչ էլ երկրաշարժի բնույթին և կարող են վկայել միջուկային փորձարկման մասին։ Սակայն Միջուկային փորձարկումների համապարփակ արգելքի պայմանագրի կազմակերպությունը (CTBTO) հայտարարել է, որ առկա տվյալները բավարար չեն նման եզրակացությունը վստահությամբ հաստատելու համար։ Չինաստանի դեսպանատունը Վաշինգտոնում այս մեղադրանքները անվանել է անհիմն և քաղաքական բնույթի։

Չինաստանը պնդում է, որ հավատարիմ է միջուկային փորձարկումների արգելքին և վերջին պաշտոնական փորձարկումն իրականացրել է 1996 թվականին։ Միևնույն ժամանակ ԱՄՆ-ը փորձում է ներգրավել Չինաստանին նոր միջուկային զենքերի սահմանափակման համաձայնագրի բանակցություններին Ռուսաստանի հետ։ Փորձագետների գնահատմամբ՝ գոյություն ունեցող պայմանագրերի ժամկետների ավարտը մեծացնում է նոր գլոբալ սպառազինությունների մրցավազքի վտանգը։