Արև, ավազ ու դատարկ լողափեր․ Թրամփի նավթային ճնշումը խեղդում է Կուբայի տուրիզմը

Կուբայի տուրիստական ոլորտը ծանր ճգնաժամի առաջ է կանգնել՝ ավիավառելիքի սուր պակասի պատճառով, որը կապված է ԱՄՆ-ի կողմից կղզի նավթի մատակարարումների սահմանափակման հետ։ Reuters-ի տվյալներով՝ փետրվարի սկզբին հայտարարված վառելիքի ճգնաժամից հետո զբոսաշրջային կենտրոններում, հատկապես Վարադերոյի հայտնի լողափերում, այցելուների հոսքը կտրուկ նվազել է։ Կանադական խոշոր ավիաընկերությունները՝ Air Canada, WestJet և Transat, արդեն դադարեցրել են թռիչքները դեպի Կուբա, ինչը մինչև ապրիլ կարող է հանգեցնել մոտ 1700 չեղարկված թռիչքի և հարյուր հազարավոր զբոսաշրջիկների կորստի։

Տուրիզմը Կուբայի տնտեսության կարևորագույն աղբյուրներից է․ միայն 2024 թվականին այն ապահովել է մոտ 1,3 միլիարդ դոլարի արտարժութային եկամուտ՝ երկրի արտահանման շուրջ 10 տոկոսը։ Սակայն վառելիքի պակասը ստիպել է հյուրանոցային ցանցերին փակել կամ կրճատել գործունեությունը․ օրինակ՝ NH-ը փակել է իր բոլոր հյուրանոցները Կուբայում, իսկ իսպանական Melia-ն փակել է դրանցից մի քանիսը։ Ռուսաստանը նույնպես ծրագրում է տարհանել իր զբոսաշրջիկներին և ժամանակավորապես դադարեցնել թռիչքները։

Վերլուծաբանների գնահատմամբ՝ եթե տուրիզմի ոլորտը ամբողջությամբ փլուզվի, դա կարող է լուրջ սպառնալիք դառնալ Կուբայի տնտեսության գոյատևման համար։ ԱՄՆ նախագահ Դոնալդ Թրամփի վարչակազմը փորձում է ճնշում գործադրել Հավանայի վրա՝ կտրելով վենեսուելական նավթի մատակարարումները և սպառնալով պատժամիջոցներով այն երկրներին, որոնք վառելիք կմատակարարեն Կուբային։ Տեղացիները նշում են, որ ճգնաժամից ամենաշատը տուժում են սովորական քաղաքացիները, իսկ կղզու տնտեսությունը աստիճանաբար կանգ է առնում։