Հրադադարի ռեժիմի շուրջ բանակցություններում գրանցվել է «նշանակալի առաջընթաց»․ CNN

ԱՄՆ-ի, Ռուսաստանի և Ուկրաինայի ներկայացուցիչները բանակցությունների ընթացքում հասել են «աստիճանական, սակայն նշանակալի առաջընթացի»՝ ապագա հրադադարի ռեժիմի գործարկման մեխանիզմների հարցում։ Այս մասին հայտնում է CNN-ը՝ հղում անելով իր աղբյուրին։ Ըստ հաղորդման՝ հատկապես ռազմական մակարդակով քննարկումները տվել են զգալի արդյունք։

Նշվում է, որ թեև քաղաքական բանակցությունները շարունակվել են լարված մթնոլորտում, ռազմական ուղղությամբ շփումները պաշտոնյաների մոտ ձևավորել են զգուշավոր լավատեսություն։ Կողմերը հստակեցրել են մի շարք առանցքային պայմաններ և ձևակերպումներ, որոնք կարող են հիմք հանդիսանալ ապագա համաձայնությունների համար։

Փետրվարի 17-18-ին Ժնևում կայացել էին Ռուսաստանի, Ուկրաինայի և ԱՄՆ-ի եռակողմ բանակցությունները՝ ուկրաինական հակամարտության կարգավորման շրջանակում։ Միևնույն ժամանակ, Axios պորտալի լրագրող Բարաք Ռավիդը, հղում անելով իր աղբյուրներին, հայտնել էր քաղաքական աշխատանքային խմբում առաջացած փակուղու մասին։