Der Spiegel․ Զալուժնին «հաստատել է» «Հյուսիսային հոսքեր»-ի պայթեցումը՝ առանց Զելենսկու տեղեկացման

Գերմանական Der Spiegel պարբերականի փոխանցմամբ՝ Ուկրաինայի Զինված ուժերի նախկին գլխավոր հրամանատար, ներկայումս Մեծ Բրիտանիայում Ուկրաինայի դեսպան Վալերի Զալուժնին հաստատել է «Հյուսիսային հոսք» և «Հյուսիսային հոսք — 2» գազատարների պայթեցման գործողությունը։ Պարբերականը հղում է անում իր աղբյուրներին՝ նշելով, որ այդ ժամանակ բանակի ղեկավարը հանդիսացած Զալուժնին տվել է համապատասխան հավանություն։

Հրապարակման համաձայն՝ որոշումը կայացվել է առանց Ուկրաինայի նախագահ Վլադիմիր Զելենսկու տեղեկացման։ Նշվում է, որ Զելենսկու վարչակազմը տեղյակ չի եղել գազատարների պայթեցման ծրագրի մասին։

Ավելի վաղ հաղորդվել էր, որ ԱՄՆ Կենտրոնական հետախուզական վարչությունը (ԿՀՎ) նախապես տեղեկացված էր «Հյուսիսային հոսքեր»-ի պայթեցման ծրագրերի մասին։ Ըստ նույն տեղեկությունների՝ 2022 թվականին ԿՀՎ ներկայացուցիչներն ու ուկրաինացի դիվերսիոն մասնագետները հանդիպել էին Կիևում, որտեղ քննարկվել էր գազատարները պայթեցնելու գաղափարը։