Իրավապահները մտել են ԲՀԿ նախագահ Գագիկ Ծառուկյանի տուն և զննություն են իրականացնում. Նոր մանրամասներ

Իրավապահները մտել են ԲՀԿ նախագահ Գագիկ Ծառուկյանի տուն և զննություն են իրականացնում։

Հետաքրքիրն այն է, որ սա տեղի է ունենում այն ժամանակ, երբ Գագիկ Ծառուկյանը հայտարարել է ընտրություններին մասնակցելու մասին, սա կարելի  է դիտարկել ընտրություններից առաջ քաղաքական հաշվեհարդար: 

Euromedia24-ի հետ զրույցում փաստաբան Էմին Խաչատրյանը նշել է, որ տվյալ քրեական գործը որևէ առնչություն չունի Գագիկ Ծառուկյանի հետ։

Նա մանրամասնել է. «Զննությունն իրականացվում է պարոն Ծառուկյանին պատկանող այլ առանձնատանը, ոչ թե նրա բնակության հասցեում։ Գործը հարուցվել է դեռևս 2020 թվականին՝ Առինջ համայնքի նախկին պաշտոնատար անձանց վերաբերյալ», հավելելով, որ դրա շրջանակում անհրաժեշտություն է առաջացել զննել Առինջ համայնքի մի շարք հողատարածքներ, այդ թվում՝ նաև Ծառուկյանին պատկանող տարածքները։
Գագիկ Ծառուկյանն այս վարույթով հարցաքննվել է դեռևս 2020 թվականին՝ վկայի կարգավիճակով։ Դրանից հետո նրա վերաբերյալ կամ նրա մասնակցությամբ որևէ քննչական գործողություն տեղի չի ունեցել։

Գործողությունը կատարվում է փորձագետների միջոցով և, ըստ ամենայնի, շուտով կավարտվի։ Կիրականացվեն որոշ չափագրումներ և լուսանկարահանում, որպեսզի հնարավոր լինի ներկայացնել փորձագիտական եզրակացություն, մանրամասնել է փաստաբանը։

Նշենք, որ 2020 թվականին Քննչական կոմիտեն հայտնել էր՝ Կոտայքի մարզի Առինջ համայնքի ղեկավարին մեղադրանք է առաջադրվել ՀՀ քրեական օրենսգրքի 308-րդ հոդվածի (պաշտոնեական լիազորությունները չարաշահելը) 2-րդ մասով նախատեսված արարք առերևույթ կատարելու համար։