Կայա Կալլասը ԵՄ երկրներին ներկայացրել է պահանջների փաթեթ Ռուսաստանին՝ Ուկրաինայի հարցով

Եվրամիության արտաքին գործերի և անվտանգության քաղաքականության բարձր ներկայացուցիչ Կայա Կալլասը անդամ պետություններին է փոխանցել փաստաթուղթ, որը ներառում է Ռուսաստանի հասցեին ներկայացվող պահանջներ՝ Ուկրաինայի հակամարտության կարգավորման շրջանակում։ Այս մասին հայտնում է «Страна.ua»-ն՝ հղում անելով իր աղբյուրներին։ Եվրոպացի դիվանագետների խոսքով՝ փաստաթուղթը ներկայացնում է ԵՄ «առավելագույնական» դիրքորոշումը այն հարցում, թե ինչ քայլեր պետք է կատարի Մոսկվան։

Փաստաթղթում նշվում է, որ եթե Կիևը պետք է սահմանափակի իր զինված ուժերի թվաքանակը կամ դուրս բերի դրանք որոշ շրջաններից, ապա «Մոսկվան պետք է կատարի նույն քայլերը»։ Առանձին կետով ընդգծվում է նոր ռուսական տարածքների «դե յուրե չճանաչման» և դրանց «ապառազմականացման» պահանջը։ Կալլասը նաև հանդես է գալիս Ռուսաստանի օրենսդրության այն նորմի վերացման օգտին, որով ազգային օրենքները գերակայում են միջազգային պայմանագրերին։

Բացի այդ, փաստաթղթում պահանջվում է արգելել Ռուսաստանի ռազմական ներկայությունն ու միջուկային զենքի տեղակայումը Բելառուսում, ինչպես նաև փոխհատուցել Ուկրաինային և եվրոպական երկրներին հասցված վնասը։ Նշվում է, որ Ուկրաինայում խաղաղություն չի կարող հաստատվել առանց ԵՄ մասնակցության բանակցություններին և առանց բլոկի առանցքային շահերի հաշվառման։ Փաստաթուղթը նախատեսվում է քննարկել փետրվարի 23-ին Բրյուսելում կայանալիք ԵՄ ԱԳ նախարարների հանդիպման ժամանակ։