Երեք երկրների փորձաքննությունները հաստատում են՝ Արշակ Սրբազանը կապ չունի տեսագրությունների հետ. Արսեն Բաբայան

«Երեք երկրներից ստացել ենք տեսագրությունների միջազգային փորձաքննությունների արդյունքները, էլի երկրներ կան, որտեղից սպասում ենք եզրակացությունների, բայց երեքը բավարար են, որպեսզի խոսենք այդ մասին»,- ճեպազրույցի ժամանակ հայտարարել է Արշակ Սրբազանի պաշտպան Արսեն Բաբայանը։

Փաստաբանը հիշեցրել է, որ դեռևս փետրվարի 15-ին տեղեկացրել էր՝ նախորդ տարվա նոյեմբերին իր նախաձեռնությամբ նշանակված փորձաքննությունների արդյունքները պատրաստ են։ Նրա խոսքով՝ թեև մի շարք այլ երկրներից եզրակացություններ դեռ սպասվում են, սակայն արդեն ստացված երեք փորձագիտական կարծիքները բավարար են գնահատականներ հնչեցնելու համար։

Անդրադառնալով Քննչական կոմիտեի այն մեկնաբանությանը, թե նշված միջազգային փորձաքննությունները չունեն ապացուցողական նշանակություն, Բաբայանը դա որակել է «տարօրինակ ու շատ զարմանալի»։ Նա նշել է, որ ՔԿ-ի հայտարարությունը, թե իրենց կողմից նշանակված փորձաքննությամբ իբր հաստատվել է, որ տեսագրության մեջ պատկերված անձը Արշակ Սրբազանն է, մի շարք հարցեր է առաջացնում։

«Շատ զարմանալի է, թե ինչու ՔԿ-ում չգիտեն, որ փաստաբանը կարող է փորձաքննություն նշանակել։ Քրեական դատավարության օրենսգիրքը նախատեսում է նման կարգ։ Ասել, թե դա իրականացվել է օրենսգրքից դուրս, ինձ համար անհասկանալի է»,- ընդգծել է Բաբայանը։

Միաժամանակ նա հավելել է, որ պաշտպանական կողմը միջազգային փորձաքննությունները չի իրականացրել բացառապես քրեական վարույթում որպես ապացույց ներկայացնելու նպատակով, այլ նաև հանրային տարածքում ձևավորված կարծիքներին արձագանքելու և իր վստահորդի հեղինակությունը պաշտպանելու համար։