ԱՄՆ Գերագույն դատարանի որոշումը համաշխարհային տնտեսության համար դրական ազդեցություն չի ունենա. վերլուծաբան

ԱՄՆ Գերագույն դատարանի որոշումը, որով սահմանափակվեց Դոնալդ Թրամփի կողմից մաքսատուրքերի կիրառումը արտակարգ լիազորությունների հիմքով,  համաշխարհային տնտեսության համար արագ և զգալի դրական ազդեցություն չի ունենա։ Ինչպես գրում է Reuters-ը, վերլուծաբանների գնահատմամբ՝ վճիռը կարող է ստեղծել նոր անորոշությունների փուլ, քանի որ գրեթե վստահ է, որ Թրամփը կփորձի այլ իրավական մեխանիզմներով վերականգնել չեղարկված մաքսատուրքերը։

Դատարանի որոշումը վերաբերում է միայն Միջազգային արտակարգ տնտեսական լիազորությունների մասին օրենքի (IEEPA) հիմքով սահմանված տուրքերին, որոնք, ըստ գնահատականների, ԱՄՆ բյուջե էին բերել ավելի քան 175 միլիարդ դոլար։ Թրամփը արդեն հայտարարել է 10% համաշխարհային նոր մաքսատուրքի մասին՝ նախնական 150 օր ժամկետով, միաժամանակ ընդունելով, որ դեռ հստակ չէ՝ արդյոք նախկինում գանձված գումարները կվերադարձվեն։

Global Trade Alert-ի հաշվարկներով՝ որոշումը միջին սահմանված ամերիկյան մաքսատուրքը նվազեցնում է մոտ 15.4%-ից մինչև 8.3%։ Չինաստանի, Բրազիլիայի և Հնդկաստանի համար կրճատումն ավելի զգալի է, թեև տուրքերը շարունակում են բարձր մնալ։

Այնուամենայնիվ, փորձագետները չեն ակնկալում, որ ներկայիս իրավիճակը երկար կպահպանվի։ Թրամփի վարչակազմը դեռ մինչ վճիռը ազդարարել էր, որ անհրաժեշտության դեպքում կօգտվի այլ օրենքներից՝ մաքսատուրքերը վերականգնելու համար։