Թրամփը ստորագրել է համաշխարհային 10% մաքսատուրք սահմանելու հրամանագիր

ԱՄՆ նախագահ Դոնալդ Թրամփը հայտարարել է, որ ստորագրել է հրամանագիր, որով սահմանվում է 10 տոկոսանոց առևտրային մաքսատուրք աշխարհի բոլոր երկրների նկատմամբ։ Այդ մասին նա հայտնել է Truth Social հարթակում՝ նշելով, որ որոշումը կայացվել է Օվալաձև աշխատասենյակից։ Նոր միջոցը ուժի մեջ կմտնի փետրվարի 25-ից և կգործի 150 օր։

Որոշումը հրապարակվել է ԱՄՆ Գերագույն դատարանի վճռից մեկ օր անց, որով դատարանը սահմանափակել էր նախագահի լիազորությունները՝ նշելով, որ 1977 թվականի Արտակարգ տնտեսական լիազորությունների մասին օրենքը չի թույլատրում նախագահի կողմից ներմուծման մաքսատուրքերի միանձնյա սահմանում։ Սահմանադրության համաձայն՝ նման լիազորություն ունի միայն Կոնգրեսը։ Թրամփը դատարանի որոշումն անվանել է «ամոթալի» և հայտարարել, որ ունի այլընտրանքային ծրագիր՝ պահպանելու ազգային անվտանգության հետ կապված մաքսատուրքերը։

Թրամփը առևտրային քաղաքականության խստացումը սկսել էր դեռևս Սպիտակ տուն վերադառնալուց հետո՝ նախ սահմանելով մաքսատուրքեր Կանադայի և Մեքսիկայի նկատմամբ՝ ապօրինի միգրացիայի պատճառով, ապա նաև Չինաստանի դեմ՝ ֆենտանիլի մատակարարումների հարցով։ Ապրիլին նա սահմանել էր փոխադարձ մաքսատուրքեր ավելի քան 200 երկրների և տարածքների նկատմամբ, ինչպես նաև բարձրացրել էր մաքսատուրքերը պողպատի, ալյումինի, պղնձի և այլ արտադրանքի համար։