ԱՄՆ-ի գազային հաջողությունները կարող են հարվածել սեփական տնտեսությանը

ԱՄՆ-ը վերջին տարիներին դարձել է հեղուկացված բնական գազի (LNG) աշխարհի խոշորագույն արտահանողը՝ առաջ անցնելով Ավստրալիայից և Քաթարից։ Եթե մինչ 2000-ականների «շեյլային հեղափոխությունը» երկիրը գազի ներմուծող էր, ապա արդեն 2022-ից սկսած՝ արտահանման ծավալները կտրուկ աճեցին՝ հատկապես Եվրոպայում ռուսական գազի մատակարարումների նվազման ֆոնին։ 2025 թվականին ԱՄՆ-ը արտահանել է ռեկորդային 142 միլիարդ խորանարդ մետր LNG, իսկ առաջիկա տարիներին հայտարարված նախագծերով արտահանումը կարող է հասնել ավելի քան 260 միլիարդի։

Սակայն մասնագետների գնահատմամբ՝ արտահանման արագ աճը բացասական հետևանքներ է ստեղծում հենց ԱՄՆ-ի ներսում։ Ներքին շուկայում գազի գները սկսել են աճել․ եթե երկար տարիներ հազար խորանարդ մետրի արժեքը մոտ 100 դոլար էր, ապա 2025-ին այն հասել է 150 դոլարի, իսկ ձմռանը գերազանցել է 200-ը։ Արտահանման հնարավորությունների ընդլայնումը կարող է հանգեցնել նրան, որ արտադրողները նախընտրեն վաճառել գազը արտաքին շուկաներում՝ բարձր գներով, ինչի հետևանքով ամերիկացի սպառողները և արդյունաբերությունը ստիպված կլինեն վճարել ավելի թանկ։

Վերլուծաբանները զգուշացնում են, որ գազի թանկացումը կարող է հարվածել ինչպես բնակչությանը՝ բարձրացնելով ջեռուցման և էլեկտրաէներգիայի ծախսերը, այնպես էլ արդյունաբերությանը, այդ թվում՝ պարարտանյութերի արտադրությանը և գյուղատնտեսությանը։ Նշվում է նաև, որ այս պայմաններում ԱՄՆ-ը կարող է վերանայել նոր արտահանման հզորությունների ընդլայնման քաղաքականությունը՝ փորձելով հավասարակշռել արտաքին հավակնությունները և ներքին տնտեսական շահերը։