Reuters․ ԱՄՆ-ի մաքսատուրքերի չեղարկումը կարող է «բումերանգ» դառնալ եվրոպական բիզնեսի համար

ԱՄՆ Գերագույն դատարանի որոշումը, որով ապօրինի են ճանաչվել նախագահ Դոնալդ Թրամփի սահմանած մի շարք ներմուծման մաքսատուրքեր, կարող է բացասական հետևանքներ ունենալ եվրոպական բիզնեսի համար։ Այս մասին հայտնում է Reuters-ը՝ հղում անելով Եվրամիության ձեռնարկատերերի կարծիքներին։

Եվրոպացի գործարարների գնահատմամբ՝ մաքսատուրքերի չեղարկումը կարող է ստեղծել լրացուցիչ իրավական անորոշություն և հանգեցնել պատվերների սառեցման՝ պայմանավորված կարգավորումների փոփոխությամբ։ Նրանք մտավախություն են հայտնում, որ գործող իրավական դաշտի խաթարումը կարող է հանգեցնել նոր սահմանափակումների և լրացուցիչ մաքսատուրքերի կիրառման։

Իռլանդական վիսկիի ասոցիացիայի տնօրեն Էոին Օ’Քաթեյնի խոսքով՝ ստեղծված իրավիճակը «ևս մեկ բարդություն և սցենարի նոր շրջադարձ» է եվրոպական բիզնեսի համար, որը արդեն իսկ բախվում է ԱՄՆ բարձր մաքսատուրքերի հետևանքներին։ Միաժամանակ ԱՄՆ ֆինանսների նախարար Սքոթ Բեսենթը կոչ է արել պահպանել գործող առևտրային պայմանավորվածությունները, իսկ Թրամփը դատարանի որոշումը անվանել է «խորը հիասթափեցնող ամոթ» և հայտարարել է համաշխարհային 10 տոկոսանոց նոր մաքսատուրքի մտադրության մասին։