«Ոչ Արևմտյան Ադրբեջանին» նախաձեռնության նպատակն է կանխարգելել վաղվա հնարավոր սպառնալիքները (տեսանյութ)

«Ոչ Արևմտյան Ադրբեջանին» նախաձեռնության հիմնական նպատակն է դիմել Միավորված ազգերի կազմակերպությանը, մասնավորապես՝ Անվտանգության խորհրդի մշտական հինգ և ոչ մշտական տասը անդամ պետություններին։ Խնդիրը վերաբերում է Ադրբեջանի նախագահի վերջին հայտարարություններին, որոնք հնչել են ինչպես Մյունխենի անվտանգության խորհրդաժողովի 62-րդ նստաշրջանի ընթացքում, այնպես էլ «Ֆրանս Պրես» գործակալությանը տված հարցազրույցում։

Euromedia24-ի հետ զրույցում հայտարարել է պահեստազորի գնդապետ, ռազմաքաղաքական վերլուծաբան Հայկ Նահապետյանը։

Զրուցակիցը մտահոգություն է հայտնում, որ Ալիևի կողմից անընդհատ առաջ քաշվող «Արևմտյան Ադրբեջան» գաղափարախոսությունը վերածվում է պետական քաղաքականության․

«Հատկանշական է, որ «Արևմտյան Ադրբեջան» գաղափարախոսությունը ներկայացվում է իբր հասարակական նախաձեռնության տեսքով, սակայն գործնականում այն ամբողջությամբ հովանավորվում և ֆինանսավորվում է պետության կողմից։ Օգտագործվում են պետական քարոզչական հարթակները, Ազգային ժողովում ձևավորվել է համապատասխան խումբ, իսկ Ադրբեջանի պետությունն ինքն է հանդես գալիս որպես այդ գաղափարի կրող և իրագործող՝ ստեղծելով անհրաժեշտ գործիքակազմը։

Այս պայմաններում մարտահրավերը Հայաստանի համար խիստ առարկայական է և պահանջում է համարժեք արձագանք՝ ինչպես իշխանությունների, այնպես էլ ընդդիմության ու փորձագիտական շրջանակների կողմից»,-նշում է Նահապետյանը՝ ընդգծելով, որ  մինչ այժմ Ադրբեջանի նախագահի հայտարարություններին պաշտոնական հստակ հակադարձում չի եղել

Հայկ Նահապետյանը շեշտում է՝  «Ոչ Արևմտյան Ադրբեջանին»  նախաձեռնության նպատակը քաղաքական պայքար մղելը չէ, այլ կանխարգելել վաղվա հնարավոր սպառնալիքները։

«Այն  միտված է իրազեկելու հանրությանը, ձևավորելու լայն քննարկում և, անհրաժեշտության դեպքում, իշխանությունների վրա գործադրելու օրինական ճնշում՝ պետական շահերի պաշտպանության նպատակով»,-հավելեց Նահապետյանը ։